ГIумар Жамалудинов

Автор: admin     Категория: Умар Жамалудинов31403 просмотров

Умар Жамалудинов

МагIил цIурал берал,
ЦIалтун буртина.
ЦIалъун бухIаниги,
ЦIоролеб керен.

********
Дица тIамулеб гали, гуро ишан тIогьибе
ТIагIине бокьун гьечIо гьудуллъиги вацлъиги,
Цинги хъварал мухъазул мурад батIияб буго
МагIарул мацI лугIилин дагьавго хIинкъун вуго.

Рокьи ккаразул гуро гIишкъул цIа гьелегьулеб
Гьунар бугесул гуреб цIарги тIибитIулареб,
Дир авар милаталъе мукъсанлъи кколеб бихьун
Бахьи къосараздехун дагьабго хитIаб буго.

ХIабургъине биччаге бечедаб магIарул мацI
ЦIаялъ бухIизе тоге умумузул хазина!
Дуда мугIрул рихьанищ, гьезие салам кьунищ?
Кьурул парсазде вахун чундузул хал гьабунищ?

ТIаса мегIер бихьаниш, гIазул тIогьал мерхьанищ?
КIкIалазул гъварилъабаз дуда гIарзал рахъанищ?
Мун магIарулав вугиш, мацI кIочон толеб бугищ?
Цо бицаралда хадуб лъабго гIурус абулищ?

Мун магIарулав вугиш, мугIрул гIан къвакIун вукIа!
Мун аварав ватани, авар мацI кIочон тоге!

***

Мун рикIалъанагIан аскIой ятула
КIвар дур гьабунагIан гIагарде шола
Мун дир гьал къасдазул зулмукье ккарай
Кинго гIайиб гьечIей чIухIарай асир

Мун хьолбохъин тола туснахъги гьаюн
Хиялаз къотIула судалъул хIукму
Мун дир анищазул ахикь бижараб
Кваназе рес гьечIеб мугь меседил гIеч

***

Къимат тIокIаб къатIипа бичун босун щолареб
Базаралдеги бачун хазиналъун гьабурай,
Аваристан машгьурай журналистазул мухъилъ
Хъвайги Хадижат дур цIар меседил хIарпаз биун.

***

ШигIраби шагIирзаби гIунги тIокIаб Дагъистан,
Дица саринал хъвани дунгоги суриладай?
Назмабазул авторал низам бихун ккеладай,
Калам дица гьабуни, кодоб къалам босани?

***

Эбел эмен гьечIел бестIалал хIакъаб
ХIинкъун вуго дунги ятимлъиялда,
Расулил бухIигин МахIмудил гIищкъу
ГIасрабаз цIунараб билун ккеладай?

***

МугIрул тун лъутулеб гьалагаб Гъойсу,
Буссинарищ нахъе къо лъикI гьабизе?
Сабру гьабиларищ тIагIунеб гIадат,
Дур яхI-намусалъе ахирго гьечIин.

***

Гьай-гьай, гIумру араб араб лъач1ого,
ГIоралъ бачун унеб худер кинигин.
Огь, гьаб рухIги кинаб цIакъго хирияб,
Хадур гъезе течIеб квешаб-лъикIалда.

***

Макьилъ цее тIамун, чорхол хIал бергьун
ХIалица къан буго каранда рокьи.
ГIакълу босун унеб сурат цебе чIун
Сородула лугбал дур пикрабаца.

***

Макьил хIал бергьараб бицине нечон,
Чара хварав дица кочIолъ рехсана.
Балъго турун хвезе телаан дица
Тату хвараб черхалъ рахIатго течIо.

***

Рогьунаребани сордо хехкого
Хирияйгун макьилъ бицардулаго
Берзукь ячIунарей къоялги ругин
Къаси-къаси макьилъ геройлъун йикIа.

***

Хабарни, хирияй, кигIанги буго,
Балъгого хьихьулелъ азунев вуго.

***

Гьалагаб гIоралъ ккун, ралъдалъе вачун,
Виччан тана бакьулъ, чIинкIиллъиялде.
ГIишкъуялъ бухIулеб гьинал рекIеца,
Лъедон, къватIив вачIун, къвал дуда бала.

***

Кьижизе вегарас дур пикрабазда,
БорчIунаан чанги гIашикъго сордо.
Дир бераз бахъараб дур сураталда
Хьулаз бахъулаан гIишкъуялда кеп.

Сагьвиллъун ккарасул къвал балебилан,
Къандалъо батула мунилан ккараб.
Анищалги щущан, ургьиб гьинал ракI
БухIун батулаан хIасратаб цIаялъ.

***

Маржанат, жакъаги къо бухIарав дий,
КъватIиб гъезе кIвечIо духъ бугеб урхъи.
Замана анагIан инагьдулин ракI
КIулго батуларищ кирит ричIулеб?

***

Жакъаги къо кьурав Аллагьасе рецц,
Рази ГIалимасда гIакълу бахъичIев.
Дур пикру тIагIинчIеб сордоги ана,
Къоги дур хиялаз ине батила.

***

Рокьул гIорлъун чвахун, чилчилиялда
Дир бидул рихьазулъ чапун ана мун.
ГIишкъул карачеллъун гьаб дир каранда
Ралъдада гамалъун лъедолаан мун.

***

РагIараб жо бугищ, я гIалимзаби,
ГIишкъудуй къор гъураб, къватIиб гьурщичIеб?
Бицаде бачIанищ, анищлъун чIанищ
ЧIван рехараб рокьи ракьулъ букъанин.

***

Дир рекIел къварилъи къалмикь бачанин,
Чучизе хIалбихье, хъахIилаб кагъат.
Каранда къан бугеб балъгояб унти,
КъотI-къотIун рехизе хIал гIолеб гьечIин.

***

Дур гургинаб горбода къвал базе гурищ анищ.
Дур гьел чIегIерал берал цIибиллъун цIузе анищ.
Дур чергесаб логода чапун биулеб керен
Кирит бан, гъансинибе гъезе бугеб дир анищ.

Дур хIеренал гьел кIутIби зам-замалъ чури-анищ
Чурун хадур кIутIбузда цо баизе — дир анищ.
МоцIрол хъвалхьи гIадинал дур надида, кьунсрузда
Меседил расал рижи – мурадлъун бугеб анищ.

***

Дунго гIумруялда хадув гIунтIизе
Арал къоял нахъе руссунелани,
ГIарац кьун босила бахIараб заман,
ЦогIаги инсанас бичун босани.

***

ЧIужугIадан, гIумру дур халалъаги,
Хинлъи гуреб, чорхолъ цIорой ккогеги.
Зодир цIваби гIадин, гIумру гвангъаги,
ГIаданлъи лъугIараб къо бачIунгеги.

Нужей ихтияр щвараб байрамги баркун,
Баркат, талихI, рохел нужей гьарула.
Гьалдезе биччанте нужер гъасда хьаг,
Гьимаги даимго зодихъ багIарбакъ.

***

Щайдай дие гьаб гIумру
ГIазабазул занкIун цIун.
ЦIер къараб мугIрул тIогьиб
Чанил буртIида релълъун.

***

Инсан мискинлъугеги, канлъи босун аниги,
Асс-сси букIарав гьесул, сун унеб бугин къимат.
Къадар БетIергьанасул,хъваралда щаклъи гьечIо.
ЧIухIи кьогеги дие гIадамал рихьулареб.

Бокьанищ? Бице цойгияздаги.

Опубликовать в Google Plus
Опубликовать в LiveJournal
Опубликовать в Мой Мир
Опубликовать в Одноклассники

Метки: , , , , , , ,

Оставить комментарий

Подтвердите, что Вы не бот — выберите человечка с поднятой рукой: