ТIагьират Джаватханова

Автор: admin     Категория: Тагират Джаватханова34956 просмотров

Тагират Джаватханова

КIиго сурат буго кIиго сан буго,
Цо гьурмал берцинлъи, цояб ракIалъул.
КIиябго гIасрабаз хIисаб гьабулеб,
Цояб гIумру къокъаб, цояб хвел гьечIеб.

********

ЦIУНЕ РАХЬДАЛ МАЦI

Къалмикьан магIу тIун тIекълъигун къеркьон,
Къанабакь чан шагIир гIасрабаз лъурав.
ГIайибазул хеч къан бугьтаналги лъун
РагIул устарзаби гьаруна инжит.

МагIарул каламгун кодоб хвалченгун,
Киналго рагъазулъ гIахIаллъана гьел.
Хадусел гIелазда кIочонгутIизе
ГIагараб рахьдал мацI рухI кьун цIунана.

Дунял гIаламалъе магIарул мацIалъ
МахIмудица хъвана бацIцIадаб рокьул.
ХъахIал къункърабазде руссарал вацахъ,
Расул инагьдана магIарул кучIдулъ.

МагIарул мацIалда шигIру цIализе,
ЦIа боркьараб рагъде йортана Фазу.
Афганистаналда гулид расарал
Васазул къаданий синкъана шагIир.

МагIарул ясаца магIарул васаз
МагIарул гуреб мацI бицунге гъасда.
Эбелалъул рахьгун чорхолъ босараб,
Басра гьабичIого цIуне рахьдал мацI.

********

ЩИВАСУЛ РУКЪАЛЪЕ РЕКЪЕЛ ГЬАРУЛА

Щивасул рукъалъе рекъел гьарула,
Гьуинаб гъансито гъункараб хъизан.
НакIкIал гьечIеб зобгун гьури гьечIеб бакъ,
Къварилъи лъалареб сасараб гIумру.

Щивасул ракIалъе хинлъи гьарула,
Хиятналъи гьечIел гьудул-гьалмагълъи
Хириял умумуз малъараб гIакълу
ГIадалъе босулел лъимал гьарула.

Щивасул рукъалъе рикъзи гьарула
Гьарзаго магIишат дунял гьарула.
Гьарун вачIарасе садакъа кьезе,
Сахаватлъи гурхIел рахIму гьарула.

Щибаб лъимералъе эбел гьарула,
Щибай эбелалъе лъимер гьарула.
Гьоболлъухъ рачIине лъималги кватIун
Рагьда бералги лъун умумул тоге.

Эбел-инсул рокъоб сунгеги чирахъ,
Хъанхъра чIван гъансито тогеги цIорон.
Гъасда гIодов вукIун маргьу бицунев,
КIудада сверун ккун рукIаги лъимал.

Рекъел, рохел-талихI халатаб гIумру,
Хиралъарал ракIал цоцалъ данделъи.
Хириял гIадамал сахлъи нужее!!!
БатIияб цойги щиб нилъей хIажатаб?

********

ЧIУЖУГIАДАН

Йиго чIужугIадан жийго бакъ гIадай,
ГIажаибго сверухъ хинлъи бикьулей.
Бадиса гугьарго гьими чвахулей,
Бохула гьинал ракI гьелда бер чIвайгун.

Йиго гьури гIадин гIамал хисулей
Палугьаби гIадин гьава ссун уней.
Сверухъ кIалкIучI гIадин гьей паркъолелъул,
Лъимерлъи бачIуна нилъер ракIалъе.

Йиго ,чIужугIадан ралъад гIадинай,
Гъварилъи беразул борцун кIоларей.
Балгояй хIикматай хIал паналъулей
ХIасратго жиндего тIаде ракI цIалей.

Дулъ кинабго буго тIокI, чIужугIадан
ГIатIидаб ралъадги гьуриги бакъги.
Мун йигелъуб буго цIвабиги цIаги,
ЦIар берцин гьабулеб гьунарги тIагIги!

ЙикIа , мун гьарула гьаб дунялалда
Дангъура цIун сверухъ хинлъи бикьулей.
Рокьиги талихIги тамахаб ракIги
ЙикIа мун кидаго бакълъун, ралъадлъун.

********

ТЕ ДУН МАРГЬАБАЛЪ

Щаяли лъаларо ракI буго къварид,
Къалеб бугин ккола дуниял данде.
Щивали лъаларо хьиталго тIадго,
РекIелъ жанив лъугьун лъалкI тана гъизил.

ГIадамал рокьиялъ хьухь лъурал берал
Багьана гьечIого чанги гIодарал.
ГIамал хIал лъачIого хIалихьатазул,
ХIарщул цIурал кверал росун ратула

ГIазулъан бецIцIулеб лъимгIан бацIцIадаб,
РекIелъ ругъун лъоге рецIцIалъул цIураб.
ЦIекIлъаби рихарай ххвелал лъаларей,
ХутIарабцин божи бахъуге дихъа.

ГIумру байбихьарай гIолилай гуро,
Гурониги те дун дирго маргьабалъ.
Хиянатаз чанги ханжар чIваниги,
ЧIвазе кIвечIеб ияхI гьабуге хIакъир.

Гьаб макьуги ана кьабун квер бачун,
КьогIал дарабиги мугъ кьурун чIана.
ЧIегIераб сардилги унго халалъи,
Хурхарал хивалал нужерги жахIлъи.

********

БАЛАГЬУГЕ КЪИСМАТ, СИНКЪИ РАГIИЗЕ

Къан чIвархун нуцIбигун дун гIодиларо.
ГIамалаз лъукъарал ругъназ расарал
РакIал дагьал гьечIо цо дир гуребги.
Аллагьги гурелъул лъилгойин кколел,

Ккарал гъалатIазухъ хьами баларо,
Хьухьал магIилги лъун, БетIергьанасде.
Берал щибаб сардилъ руссунин гьезул,
Гьаб сордоги ина сасина унти.

Сабру кIудиявин хIал кIолев Аллагь,
ГIодиларо къисмат , къан ругъналги ккун.
Къараб нус бахъила бадиб гьимигун,
Гьерсазул къурбанлъун къотIана габур.

Дуца дие хъварал кьогIал рагIабаз,
ьуранин бидул цуй цебехун гIемер.
ГIадатияй гурин ахIи балей дун,
АхIмакъазул мухъилъ лъуна мухъги цIан.

ГIадамаз бицараб уйиланги ккун,
Квер ккун дур бадие ялагьичIо дун.
ЧIегIерал ракIазул загьру лъачIого,
Лъен ццидал тункана дицаги дуда.

Меседил расеназ сипатги угьун,
Гьудулзаби ругин дурги зар къалел.
Замзам кьолеб гIадин закъумал гьерсал,
Къо-ас бухIаяца бугIула кодоб.

ХIеренаб гьурмада согIаб мухъги тун,
Унеб буго гирун гурхIараб магIу.
ГIумрудул вахIщилъи лъалареб лъимад,
Бабал керен буго сверухъ квашулеб.

МагIид лъалъан руго хъахIал кIаркьаби,
Вакъиялъ угьдулев гьав гъаримасул.
Кьижундай свакандай гьавурай эбел,
Лъимадухъе щвезе кватIулей йигей?

Гуро гьитIич, гьечIо кьижун дур баба,
Чидакъ гьавуна мун гьавуравго гьелъ.
Чияр цIобалазде чохьол рижи тун,
Рохьил гагу гIадин тIурун ана гьей.

Лъай гIакълу щвезегIан гьитIичид кверал,
Кирего ритIила баба ялагьун.
Цояз гурхIел гьабун кодов восила,
Цойгидаз вуцIаян зурун зинкIкIила.

КIудияв гIезегIан гIумрудул рокъоб,
Къварилъи гIатIилъи чанги бихьила.
Амма гьавуравго бабад къотIараб,
Чиякъаб, бесдалаб къадар хутIила.

Гьаруге гьарула руччаби лъимал,
Лъийго хIажат гьечIел талихI къосарал.
Эбел-эмен чIаго бесдал гьарулел,
Гьардухъаби гIадин рокьи гьарулел.

********

РАКIАЛДЕ ЩВЕЯЗУЛЪ МУНГИ НОЯБРЬ

Чашкаялъуб чайги буго цIоролеб,
ЦIорораб хаслилги сагIнил махI буго.
Бералги свакана рагьде ралагьун,
Сонал чан аниги, мун аралдаса.

РакIалде щвеязулъ мунги ноябрь,
Нахъе руссин гьечIел нилъер сардалги.
Синкъун гIодулей дир, сородилаго,
МагIу бацIцIунел дур кверазул хинлъи.

Хеккого вуссине бухьараб сапар,
СагIтаз къоял хисун дур халалъана.
Къойилго ритIулел рукIарал кагътал,
ТIокIал гьечIин чIана чанкIкIун, почтальон.

ЦIадаца чурана нилъер сухъмахъал,
ТIанхаца рахчана дур хIатIил лъалкIал.
ЛъугIана рагIаби гIищкъул бицунел,
Бицаде хутIана хадуб хъвад рокьи.

********

БАХЪУГЕ БОЖИ

Щаяли лъаларо ракI буго къварид,
Къалеб бугин ккола дуниял данде.
Щивали лъаларо хьиталгун тIадго,
РекIелъ жанив лъугьун лъалкI тана гъизил.

ГIадамал рокьиялъ хьухь лъурал берал
Багьана гьечIого чанги гIодарал.
ГIамал хIал лъачIого хIалихьатазул,
ХIарщул цIурал кверал росун ратана.

ГIазулъан бецIцIулеб лъимгIан бацIцIадаб,
РекIелъ ругъун лъоге рецIцIалъул цIураб.
ЦIекIлъаби рихарай ххвелал лъаларей,
ХутIарабцин божи бахъуге дихъа.

ГIумру байбихьарай гIолилай гуро,
Гурониги те дун дирго маргьабалъ.
Хиянатаз чанги ханжар чIваниги,
ЧIвазе кIвечIеб ияхI гьабуге хIакъир.

********

ЧИЯР ЯСАЗУЛГИ УЛБУЛ РУКIУНА

Беразул тIелхакьан тIинкIулеб магIу,
ТIагIана магIарул ясалъул кIазикь.
ГIанабазда хIуч цIан, цIамхIалаб горо
Гирун унеб буго кIаркьабаздасан.

Лъицадай гьай мокъокъ къварид гьаюрай?
Къан ругоан зарал тIеренал килщаз.
Кинаб къварилъиялъ къулараб бетIер?
Берцинал цабзазул къирщи гьабизе

ТIеренаб хьоп гIадаб черх хьвагIулаго,
Чи гьечIелъуй лъутзе бакI балагьулей.
Щайдай шалил рагIал магIид биччараб?
Бералъ чаракъосин сунца бачIараб?

Чан гIолил ясалъдай магIу къулчIараб?
Къварилъи бицине къуват гIечIого.
Къисмат чаналъулдай кьурулъан араб
КьогIал гIадатазул кIичIилъеги ккун.

Жеги жахIдачагIаз загьруял мацIаз
МицIир чанги моцIрол бекун батила.
Багьанаго гьечIел бугьтаналги лъун,
Лъун ратила хабалъ лъилниги ясал.

Гьарделей йиго дун, кверал цере ккун,
ЦихIин ургъичIого абуге рагIи.
Рокъор ругел тIанчIи тоге кIочене,
Чияр ясалазе хоб бухъулелъул!

********

ХАСЛИХЪЛЪИ

ТIогьилал тIанхазул бессараб шалалъ,
Дир ахикь ракь буго бахчун рогьалилъ.
Рогьи чIваларедухъ хасалил саву,
Ссанде жукъун буго жагъана гъветIалъ.

Рии къокъиналъул къварилъиялда
КъвинкIан тIинкIун ана гъотIодаса матI,
Къварилъана дунги къваргъи-хъуялда
Зоб къот!ун къокъунел хIанчIихъ ялагьун

Гьаваялда кьурдун ,карудул гъотIол
ТIамах боржун бачIун речIчIана гIодоб.
Хинаб роол бакъалъ беэдераб гьеб,
Хинаб сибил кибан буго хъурщулеб.

Кьижа рии кьижа,гъенарал тIанхакь
ТIад юргъанлъун бугин бегун хъах!аб накIкI.
Къараб цIер биингун гIурул хъудиялъ,
Их бачIунеб бугин ахIи базегIан.

********

ХВЕЛ ГЬЕЧIЕБ ЖО БУГО ИЯХIГУН-НАМУС

Гьурмадул берцинлъи гьадингояб жо,
Жиндиего босун соназ бахчулеб.
БоцIи -панз , бечелъи чидай толеб жо,
Жаназа арабго хъамал гьабулеб.

Хъирмил кьурогицин кьватIун щущала,
Кьолболъанго турун гъутIби щапула.
Месед-алмазалъул кунчIи дагьлъула,
Дагьлъула гIурулъ лъим ракъдаллъи ккани.

ГIумруялда жаниб щибго жоялъул,
ЛъугIулеб, дагьлъулеб, бекулеб гIадат.
ГIадамил лъимерги гIумру лъугIанин,
Абадияб рокъов къокъуна ахир.

ЛъугIуларо гIицIго гIаданлъи-ияхI,
ХIажалъуб бегьараб квералъул багьа.
ХIур хъваларо инсан сунаро кунчIи,
Камилаб берцинлъи лъикIал ишазул.

********

НАХЪЕГИ СУАЛАЛ, САБРУ ХВАРАЙ ДИР

ГIайибазул гъуни гъалатIазул гохI,
ГурхIел-рахIму гьечIо гьаб рецIелалъул.
Гьуинаб гьереси кьогIаб ритIухълъи,
Кьабулеб рекIелъ нус бадире гьимун.

Дун гIадамал какун кечI хъвалей гьечIо,
Кинниги гьезда гъорлъ дунги йигелъул.
Улка квешабилан абулей гуро,
Гучаб рокьудалъун дие бокьулеб.

Гьудулзаби руго хIажалъи ккани,
ХIалае рахъунел къасиги къадги.
ГIагарлъи къиматаб къадру кIудияб,
Къан рачел борчунел къваригIаралъуб.

Ва амма, абила къо бахъанагIан,
Къосун кколеб буго дида Дагъистан.
Дандерижи гIадин, гIагараб тIалъуй
ЛъикIаб гьечIеб къимат халлъулеб буго.

Дуниял урхъараб гIаданлъиялъул,
ГIицIго цIар хутIулеб гьечIебищ гьанже?
Гьабихъги корохъги ругьунал гьерсал,
Сверухъ кирго гьанже гьечIищ дандчIвалел?

Дие рухI-жан кьолел гIагарал чагIи ,
Чияр гIадамазе хъачIлъулел гьечIищ?
Хъулухъал цIикIиндал мадугьалзабаз,
Босуларищ салам тIаса- масаго.?

КъваригIелалъ щвани хIакимзабаца
ХIакъирго ралагьун лъоларищ нухда?
Херазул унтаби азарханазда,
Базарганаз гIадин босулеб гьечIищ?

Гьаб гIолеб гIелалъе мисал босизе,
Басрияб щибниги телариланищ
Бихьиналгун цIуял толохIочорал,
Рекламазул щитаз цIун ругин къватIал.

КъватIахъ рищниялъул къучIби хьвагIизе,
КъватIиса хIукумат щолеб батила.
Шагьра къварид гьабун минаби ралел,
Доб дуниялалде босзе ратила.

Бице ВатIан цоял битIараб бугищ
Щалайдулъе унеб гьечIищ , Дагъистан?
Сабру хварал дардаз загьрулъун тIинкIун,
Данде жаваб гьечIел гьечIищ суалал?

Я, гьардарал, бице букIинеселде
Бугебищ божилъи лъилниги хутIун.
Бечедасе гуреб бакъ баккуларел
Къоял рачIун гьечIищ Дагъистаналде?

Ратлихъ балагьун чи къабул гьавулел,
Къавмаби гемерлъун гьечелищ нилъер?
Къварилъи ккаравги риккадеган цун,
Реццалъе садакъа кьолел гьечищ нилъ?

Суалал, суалал нужер гемерлъи
Гьикъул ишараби лъихъе ритилел?
Гагараб дир улка чиярлъугеян,
Лъураб ругъун рекIелъ буго бигъулеб.

Бокьанищ? Бице цойгияздаги.

Опубликовать в Google Plus
Опубликовать в LiveJournal
Опубликовать в Мой Мир
Опубликовать в Одноклассники

Метки: , , , , , , , ,

Оставить комментарий

Подтвердите, что Вы не бот — выберите человечка с поднятой рукой: