Рабият Къурбанова

Автор: admin     Категория: Рабият Курбанова52497 просмотров

Рабият Курбанова

ГIадатлъи ,сабру, къадру учузлъуларо даим,
МагIарулай! лъугьунге заманаялда хадуй.
ДудагIан гIакълу гьечIел кьерилазул пикрабаз,
Дур умумуз бекIкIараб нухдасан кьуруге мун.

********

ДУН МУГIРУЗУЛ ЯС ЙИГО

1

Анкьумумулъ батараб
Тухумалъул нух ккурай,
Гьелдасан кьуркьудизе
ЦIиял нухал цIехечIей.
Гьелъул халатаб тарих
ТIолабго рекIехъ лъалей,
ТIаде жубазе бутIа
Дирги бугин божарай.

Реццалъе мустахIикъал
Умумузул цIараца,
ЦIвабзаца гIадин,нухал
ГIумруялъул кунчIулей.
Гьезул даражаялда
Хьвадизе нигат гуреб,
Гьездасан тIокI йорчIизе
Хиялал рекIелъ гьечIей.

ЦIаларабщинаб дугIа
Умумузул цIар рехсон
РухIазе битIичIого,
Дийго дунял гьаричIей.
Гьезул насихIат-малъи
Дурусго тIубачIого
Дирго къасдазде каву
Кидаго рагьуларей.

Чидаца еццаниги,
Кьибилалъе гIадатай.
Щиб тIокIлъи батаниги,
Гьелъул чIухIи гьабичIей.
Эбел-инсул цо рагIи
ГIумрудул закон кколей.
Кин-кин чикIалъаниги :
Дун мугIрузул яс йиго!

2

РекIей къабулаб пиша –
Къалам дуе бегIерай,
Дуй гIоло сардил макьу
БокьанагIан бичулей,
Дулъ гьурщулел пикрабаз
Гьаб дуниял сасуней,
Сунареб рекIел кIутIи
Жугьабалъ такрарлъулей.

ТалихIалъул цо лахIзат
Нуж сасун рещтIунарей.
МоцI, цIваби, сардил сасин,
Рогьалилъ лъоб щобил бакъ,
РекIей гIагараб тIалъул
ТIабигIат гIамал рехсон,
Нуж херхинчIеб щибаб къо
Канаблъун рикIкIунарей.

МугIрузул рукIкIалабахъ
ЦIикун роцIарал иццаз
Чилун гьурщулеб тарих
Балагьиялъ цIалулей.
Гьанир лъадарун гIурал,
Хвалчад жиндир цIар хъварал
Умумузул къадруялъ
Куркьбал гъун, жан цIикIкIуней.

Жаниб ракI гьалулареб
РагIи кочIолъ лъоларей,
Копое гьеб цIалкIунеб
МацI жиндие кьун гьечIей.
Кьибил жагъалаб пикру
Чидае гьурщуларей,
РакI щигIрабалъ батарай –
Дун мугIрузул яс йиго!

Кьун хадуб хвананиги
РагIи жиндир холарей.
Халатал къотIабаца
Жинца чи гуккуларей.
Тохаб лахIзат балагьун
Чидар ракI лъукъуларей.
Къваридав – пашманасе
Хинаб рагIи батулей.

Дий батараб ритIухълъи
Чидада бичIчIичIелъул,
РичIун каранзул ракIгун
КочIое гьеб чучулей.
Кьурабазулъ бижараб
Чан гьениб таруларо,
Чанлъун гьаний ятарай,
Дун мугIрузул яс йиго!

3

ЦохIо жиб ккараб рокьуй
Хилиплъи букIунарей.
БитI ккечIеб батаниги,
Гьелъий нагIана кьечIей.
ХIалалав гьудулилан
ЦIар чIвазе щвечIониги,
РакIалъ ахIулеб кочIолъ
ЦIар цойги рехсоларей.

Каранзулъ хIебтIичIилан,
РагIабаз гьеб чучичIей,
ХIехьезе хIал гIечIилан,
КъватIибе гьурщуларей.
Биун чаран лъурабцин
ТIулил ракI хIекканиги,
ХIасратаб цохIо лахIзат
РекIеласе кьун инчIей.

Гьединаб жиб гьалагаб,
Квелъ щибали лъалареб.
Гьединаб жиб сабураб,
РекIел сангар бахъинчIеб.
Гьединаб жиб къадруяб,
ЛахIзатазе къуличIеб.
РекIелъ бугилан гуреб
Рехсезе хIужа гьечIеб

Жиндирги рокьи бугей,
Гьеб ничлъун бихьуларей,
Бахьинал рагIабаца
Гьелъул бицен гьабичIей.
ГIадат – гIамал цIунарай,
ЦIар жиндирго берцинай,
Бицун щай гIемер хабар :
Дун мугIрузул яс йиго!

4

Заманалъул бакънихъе
Хасият хисуларей.
Хириябщинаб бичун
Учузаб босуларей.
Даимлъиялъ малъараб
ЦIираккияз кIоченчIей.
Чидай бахьин йихьизе
ГIагараб какуларей.

Жакъа заманалдасан
Галиялъ цее инчIей.
Нахъа хутIизегурин
ЛахIзаталъги хIинкъичIей.
ГIасрабаз хисулареб
МугIрузул закон лъалей.
Гьелъул гIурхъи бахъунин
Жеги бадибчIвай щвечIей.

ГIумру лъалез беццичIеб
ГIамал напсалъ босичIей.
РакI басандулеб асар
Цолъараб такрарлъичIей.
ХIасратаб гIолохъанлъул
Ихал жинда рекIинчIей.
Гьелъ кьолелщинал ресаз
ГIакълу жиндир къосинчIей.

ЯчIанщинаб бакIалда
Жиндир кколеб бакI лъалей.
БакIал къоял рихьунин
Сабруялъ рехун течIей.
РекIунареб чIоралъе
Ишанал ургъуларей.
Ургъелаз къвал баниги
Гьеб тIадчIван тIатунарей.

ТIадагьал хиялаца
Хасият квегъуларей.
Дир рекIей къабуллъичIеб
Чидае гьабуларей.
Лъалаго тIекълъи биччан
Чи инжит гьавуларей.
Гьединал дарсал щварай,
Дун мугIрузул яс йиго.

5

Ясазул читIиралъулъ
Маргъаллъун ятаниги,
Йижараб «ралъдай» гуреб,
Диего рецц гьабичIей.
Ихдаде гъветI гIадинан
ТIегьан йикIин лъаниги,
ТIегь базе гьеб чIил кьураб
Кьибил дахIа гьабулей.

Дун яккараб сверуда
Нур балин кIалъаниги,
Дун гурин гьей, тIалъуде
Дир рокьийин абулей.
Ракьалда хIетI хъвалареб
Рилълъин бугин бициндал,
Дун гурин гьей,чIухIийин
Ракьалдасайин чIолей.

ПасихIабин дир рагIуй
ГIемер къимат кьуниги,
Къиматаб гьаб гIумрудуй
Дандерижиян толей.
Тирилъи, лебаллъиялъ
ГIолилал росаниги,
Цеехъаналъул цIаруй
ЦIаюцIун квер бегьичIей.

Каранзул гIищкъуялъе
Цо герой вищаниги,
Гьесул муза дунилан
Роль дицаго ургъичIей.
Квешал – тохал рахъалги
ТIадхъаликь рахчун течIей ,
Гьереси артист гурей –
Дун мугIрузул яс йиго!

6

Руччабазул ихтияр
Бихьинчигун бащадаб
ГIумруйин абуниги,
ГIадатги кIочонарей.
Законалъ чан ресал кьун
Гьел цере риччаниги,
Бихьиназул цеехъан
Яхъине хиял ккечIей.

Росдал гIурхъи тарабго
Жиндир хьвади хисичIей,
Зоб – ракьалъ даим хадуб
Хал кколеб кIочонарей.
Абураб рагIудаса
Ккараб пикру рихуней,
Гьелъие жаваб кьезе
Рес гьечIеблъи бичIчIулей.

Амма вас кьун рохичIел
Рокьулел улбузеги
Гьев хIажатаб къо ккедал
Гьесулги бакI хисулей.
Дун чIужугIаданилан,
ЗагIипай гIаданилан,
ХIал ккаралъуй кидаго
Нахъекъан жий чIоларей.

Йижараб мугIрул тIалъи ,
Мун сундухъго хисичIей.
МагIарухъ росдал гIумру
ЗахIматабин къуркьичIей.
Гьал цо-цо гIолохъабаз
Беццулеб цIияб гIумру,
Дир кьурдул бакъан гурей
Дун мугIрузул яс йиго!

7

Дица мугIрузул гIорал,
Кьоял ралагьичIого,
Кьабун бокьаралъуса
Рахъиялда божулей.
Божилъи цо лахIзаталъ
Дидаго билун хадуб
МугIрузул яс абураб
ЦIар дица гIодоб лъела.

ЦохIо бицараб рагIи
РагIалде бахъичIони
Бахъун карандасан ракI
Налъуласе хIалалай.
Бажари гIоларелъуй
Цее яхъиналдасан
Дунго тIокIай гьечIилан
Къокъаб калам бокьила.

Аммаха дун йикIина,
ЙикIина гьаб ракьалда ,
Ракьалда тIад хьвадизе
Намусалъ йиччалейлъун!
Аммаха дун хьвадила,
Хьвадила дунялалда
Дица мугъ сверарабго
НагIана кьоларейлъун!

Кьуругун жиб багъулеб
МугIрул гьури рагIичIищ,
Гьелъ гIумруялъ дарсги кьун
ГIолагурищ мугIрул яс?!
Жиндир кьибил щулияб
Кьуру чучун бихьанищ,
Гьеле гIумруги дунги.
Дун мугIрузул яс йиго!

8

Лъица абураб бице,
Лъил пикру ккараб бице,
Гъаримай, загIипайин
ЧIужугIадан рикIкIине.
Гьелъул гьитIинаб рекIел
Къуркьи букIарабани ,
Кьурулъан рехичIого
Асирлъуде инаан.

Гьединал руччабазул
Ирсилайлъун кколей дун,
Ккаралъуй чарамлъила,
Ккедал гIодизе йиго.
МагIарулалъул рекIелъ
ХIеренлъиги къвакIиги
Лъицаго малъичIого,
Би – гьаналъ лъадарула.

МугIрузул, умумузул
Тарихалъ ва гIумруялъ
Тарбия жиндий кьечIей –
Гьей магIарулай гуро.
Гъазаваталъул гъалбацI
Дов имам Шамилгицин
МагIарул гIадан, дуца
ХIикмалъизе гьавурав.

Щибха бицинеб гьанже
Цойгидал миллатазул,
МугIрузул лаченгицин
Дуда бахиллъун хадуб.
БатIалъи гьечIо заман :
Ракълил я кьалул букIа,
Дур сипат гьоркьоб гьечIеб
Тарих дида лъаларо.

Чанго тIабигIияб гуч
Сабураб сасиналъулъ
Дур гьиналъ цолъун бугеб,
Цоцалъ рекъонккун бугеб?!
ЦохIо хасияталъулъ
Гьелщинал хаслъабазул
Дун магIарулай йиго!
Дун муг!рузул яс йиго!

ГIадатлъи ,сабру, къадру
Учузлъуларо даим,
МагIарулай! лъугьунге
Заманаялда хадуй.
ДудагIан гIакълу гьечIел
Кьерилазул пикрабаз,
Дур умумуз бекIкIараб
Нухдасан кьуруге мун.

Даимлъиялде данде
Дагьал ригьал цIаларо,
ЦIадиро гIолохъанлъул
ТIадагьаб букIунеб лъай.
МагIарулалъул мунагь
ТIасарехун унаро,
Къойилго такрар гьабе :
«Дун магIарулай йиго!»

********

ЭБЕЛ ДУР ГIАКЪЛУДУЛ ТАПТАРГИ БЕГУН

Эбел, дур гIакълудул таптарги бегун,
Дица дирго къисса херхунеб буго.
Хадуб гъезе тараб, рекIинчIебщинаб,
РекIел матIабазулъ цIехолей йиго.

ГIемер хIалкъай, хIалуцин
Жаниб гъанкъараб гIоди,
Биччан тараб мехалда
Тукриялде сверула.
РухIелалъул бухIиялъ
ТIулалъ ругънал гьаричIей,
Гьадингояй магIихъан
Яхъунаро цониги.

Дун жеги гьитIинай яс
Эбелгун цо нухалда,
Цо гIолохъанчи хвараб
МагIирокъой йикIана.
Хвел-камиялъул унти
Дирго рекIеда хъвачIей
Дица гьикъана: «Кинан
Додин гIодизе щолин»

ХIукуматалъул кверчIвай
Дагьаб гурони гьечIеб
Доб мехалъул бестIалай ,
Эбел дихъ ялагьана.
ГьабсагIат дир ригьалде
Жеги яхъинчIей кIодо
Кодоб щуго лъимергун
ХутIиялъул бицана.

Гьел лъималазда цебе
Сабру хвей бахчулаго,
Кьуру-парсабалъ кIодол
Зикру рагIулаанин.
МагIихъабазе Бичас
НагIана кьолин абун,
Лъицаяли гьелъийги
ГIакълу кьунин, бицана.

Гьелдаса нахъе дица,
ГIалах-щобазда йикIун,
Зикрудул гьаракь рагIун ,
ХIетIе сасине тола.
Кинаб рухIел бихьарай
ГIадандай гьей йигилан,
Пикрабалъ йигей дида,
Гьелъулъ гIоди рагIула.

ГIицIлъарал гIалахазулъ,
Сверулеб гьуриялъулъ,
Гьелъул пашманлъиялъулъ
Дида зикру рагIула.
РагIула бестIал лъимал,
Къороллъарал руччаби,
Эбел, гьел бестIалазулъ
ТIамула дида цее.

Эбел!гIазизай эбел,
Дуда бихьанщиналъул
Цо бутIа бихьичIей дун
Дуй зигардулейщинай!
КIодо!гъаримай кIодо,
Дуца хIехьанщиналъул
Цо хIалбихьи лъачIей дун
ГIодулей йигейщинай!

Цо-цо Бичасул гьукъи
Нужеца бихханиги,
МугIрул чIужу! магIихъан ,
Гьабиларо бадибчIвай.
Дунги кочIохъанлъидал,
Щапун магIица цIурал
Назмаби хъвачIеб къого
Дирги букIунарелъул!

Вай дир мугIрул руччаби!
Сабру къулчIулареб къо
Гьаб къисматалъ нилъехъе,
Унго, битIулареб куц!
Цояз кечI, цояз зикру,
Цойгидаз – тукри-магIу,
Чан ракI чучи цIехонги,
Бигьалъи щолареб куц!

********

Эбел, сапаралдасан
Дун рокъое юссиндал,
Дихъе бегьараб дур квер,
Огь доб букIараб хъачIаб!
Гьезул квали сасараб
СагIатго букIунебдай?!
Сундего гIунтIулел гьел,
РегIуларел дудего.

Эбел, дур ботIрол расал
ХъахIлъун ругин абидал,
Хирияб дур гьурмада
РукIкIалаби тIатиндал,
Ниж къачIалей йикIаго
Дудего регIичIилан,
Цо гъоркьанго гIадинан,
Рехун толаан дуца.

Жакъа хъачIаб квералъул
Хабар дица гьабидал
ТIулалъ гъанкъараб доб ицц
БецIцIун бачIана къватIиб.
Абуна, дур берцинлъи
Нижелъ такрарлъун бугин,
Тамахал жиндир кверал
Нижей гIоло хъачIлъанин.

Эбел, ракIалде щвана
Доб цо рикIкIадаб рии,
Дир анцIила анкьго сон,
Росдал цо гIолилав вас.
Дир гIолилал анищал,
ГIумруялде дол хьулал,
Досие гьанже ани
Билулеб гьеб кинабго.

Дуца абуна лъимал
Улбузул рекIелгъейин,
Жодорго херлъиялъе
Гъоркьлъалий кьолеб къарзин.
Амма мун цого йикIун,
Дулъго лъугIараб наслу,
Наслабалъ цIар течIого
ТIагIунеб жо бугилан.

Дур магIнаяб доб харбихъ,
Эбел, дун гIенеккичIо,
Шекспирил «Сонеталищ»
ЦIаларалин гьикъана.
Мун гIадахъ йосичIейлъи,
Лъала, дуй рихараблъи,
БукIинчIелъул доб мехалъ
Дир жакъасеб гьаб бичIчIи.

Йихьулищ ,эбел, дуда
Щибаб къо къваридай дун?
КъваригIунарин тараб
Кинабго хIажатай дун?!
Киб рехилеб, кибего
ЯрагьинчIеб берцинлъи?
Щал реэдилел гьанже
ХъачIлъи хъвачIел гьал квераз?!

Хирияй, киданиги
Дий бадибчIвай гьабичIей,
Жакъасеб гьаб дур жаваб,
Огь дида хъатIараб куц!
Лъала щибаб кечIалъулъ
Такрарлъулей йигейлъи,
Амма цо дирго гъалатI
ГьабичIо гьениб ритIухъ!

Такъсир тIаде босунин
ТамихI гIодобе цIазе,
ТакъсирчиясулгIанги
ТалихIалде хьул сварай,
Эбел, дие гьаб гIумру,
КъватIибе горду гьечIеб,
ГIуж-заманцин къосунеб
Беццаб рукъ буго лъугьун.

Эбел, сапаралдасан
Дун рокъое юссиндал
Данде ячIуней мунги,
Шекспирил «Сонеталги»,
Кагъат-къалам сокIкIараб
Нахъ дун хIалтIулеб столги,
Дур росичIел малъияз
Гьабулеб бадибчIвайги,-
Гьеб гуреб къабуллъичIей,
Абе, къварилъугейин.

Доб рикIкIадаб рииги,
Эбел, дов гIолилавги,
Кьерилаз гIей гьабулеб,
Дий бегьичIеб къисматги,
Херлъуй лъечIеб нахърател,-
Нахъа гьечIеб дир наслу,
Гьанже гIакълуялъ борцун,
Абе,эбел, гIодейин!.

********

Дир кочIол жугьабазулъ,
Дир тIехьалъул гьурмазда,
Гьадингояв вас гурев,
Гьудулин гьудул гурев,
Дарсазде цадахъ хьвадун,
Хьолбохъ лекцияби хъван,
ГьабсагIат мун щивилан
Рехселев, абе дурго?!

ТIолабго дунялалда,
РитIухъалщинал нухал
Дур сапарал ратилин
ТIадагьго божулаан.
Берцинабщинаб гIамал,
ГIакъилабщинаб калам,
Дур рекIелъ тIирщиялда
Щаклъи дир букIинчIоан.

Щенолебщинаб цIадал
ЦIорорабщинаб къатIра
Хварав инсуда хадуб
Дур магIуйин кколаан.
Недегьабщинаб балай,
Тамахабщинаб гьими,
Эбелалде вуссарав
Дур сипатин кколаан.

ГьитIинал вац-яцазул
Агъаз тIаде босулел
Васал рихьанщинахъе
Мун цеве вачIунаан.
Дур гIелелъул гIолилал,
Рукъ-магIишат гIуцIулел,
Дие халлъанщинахъе,
Дур пикру гьабулаан.

Дурго хъизан-рукъалде
Къан тун, къиричIеб нуцIа,
Бегьун квергун вацазе
Цин кIал-кIала рагьарав,
Дур сабураб гIамалги
ГIажаибаб дур ракIги,
Цо-цо бахиллъун гурей,
Дида бичIчIулароан..

Сонал инчIев, ригь инчIев
Рагьдухъго дуцаго мун
Хъизаналъул бетIерлъун
Лъуна инсул бакIалда.
Лъалаан,вас, дида мун,
Лъана дур хъизан нахъа.
Рагьана дуца дий ракI,
Рагьана рокъоб нуцIа.

Къабул гьаюна дун лъикI
Дур вацал-эбелалъги.
Гьезул гIадатлъиялъ дун
Гьаюн йикIана асир.
Амма гьелдаса нахъе
Сасана мун, хисана.
Дуй абизе бокьараб
Щибдай дида бичIчIичIеб.

Нилъер гьудуллъиялъул
Цойги мегIелилъидал,
ГIезегIан гIодой йиччан
ТIамун букIана гали.
Дун балагьун йикIана.
Дун гIенеккун йикIана!
Амма нилъеда гьоркьоб
ЦIорол кьуру бижана.

Щиб лъугьараб, вас дуе?
Киб биччараб дир гъалатI?
Дуцаги абуларо.
Дидаги бичIчIуларо.
Дида лъалев гьединав
Мун кидаго вукIинчIо.
Кинав ватананиги,
ВичIчIилаан дида мун.

Амма лъукъана дуца
Дир ракI бищун гъваридго.
Гьеб мехалъ рехун тана
Сабруялъ дун тIуянго.
ЧIвана, вас, чIвана дуца
Дилъ хIакъикъиябщинаб.
Лъаларо гьанже дида
Лъида лъелеб божилъи.

Балагьана лъагIелаз.
ГIенеккана сонаца.
ТIоцебе хвана хиял.
Хадур рилана хьулал.
МукIурлъичIо мацIалъе
Дуй рецц гьабулеб калам.
Каранлъа кIкIуржун ана
ХутIараб цо дир божел.

Сундулъго низам-гIадлу,
АхIун абулеб рагIи.
Кверде бачинчIеб къуват,
КвегъичIеб гуч букIинчIей,
Гучаб къуват батана,
Васав, дур гIенеккун чIей.
Гьелъ гуреб дир тIолго жан
Накалда лъун кIвечIоан.

Щайха, вас, щай гьедин мун
Дие согIав ватарав?
Цо рагIи абун дир ракI
ГIодоб биччазабичIеб?
Суалал, ишараби –
Дур щибаб лъикIлъиялда,
Хадуб тIад хIуччги цIазе
Щай дуцаго тIамурай.

РекIее бакIабщинаб,
ТIулий захIматабщинаб,
Дуе рагьизе гурищ
Ругьунлъун йикIарай дун.
Дудасан гIарзал разе
Гьанже кие айилан,
Копое гIадин дуца,
Гьадинан янгъиз тарай?

Дир щигIрабазул таптар
Тун букIана дица дуй,
Рагьун батула дуца
Гьеб цохIо нухалъгIаги.
Дуй сайгъат гьабулаго,
Дица гьениб гьабураб
Хъвай-хъвагIай букIа абе
Гьанже дуе бадибчIвай.

«Дир ракIги дир саринги
Дуй хIалал гьабулаго»,
Гъоркь гъулбасараб дир квер
Сородула гьанжеги.
«Дир тIехьги тIулил рухIги
Дур кодобе кьолаго»,
ХIалакараб чорхол би
ТIаде цула гьанжеги.

ХIал кьечIого рачIарал
Дол хIеренал рагIаби,
Дир сардал-къоязда тIад
ТIавагьуна – тIагIуна.
РачIуна — дур пикрабаз,
Рачахъула магIица.
Амма дол рукIунилан
РекIекълъичIо кидаго.

Цоялда хадуб цоялъ –
Щибаб асаралъ тедал,
ХутIун буго щакдари
Суалазул сияхIгун.
Щай мун дир пикрабалъа
Кинго вичIулев гьечIев?
Щай дур цIар дида хьолбохъ
РагIадлъун хьвадун бугеб?

Къисадуй гIураб тарих
Жаниб бачараб асар,
Кинаб эпилогги хъван
Гьеб лъугIизе гьабилеб?!
Араб бакI лъаларого
ТIагIаниланищ телев,
Яги тIаджубай гьалъул
БукIиниланищ хъвалеб?!

Дир кочIол жугьабазулъ,
Дир тIехьалъул гьурмазда,
ГьабсагIат мун щивилан
Рехселев, абе дурго?!

********

Гьаб дир цIияб кечIалъул
Куплет байбихьулаго
Цойил тарих хъварабго,
Лъалхъун хутIулей йиго.
Дун цо йиго. Цо йиго!
ЦохIого хутIун йиго.
Хадуб тарихго гьечIеб
Цойилаб гIадин йиго.

Дир хирияв БетIергьан,
ТIаса лъугьа мун дида,
«Дир» абураб жо гьечIин
Гьадин заназдунин дун.
ТIад щвезе лъимер гьечIеб
Зани бихьанигицин,
Гьебги дидаго релълъун
Бихьун, хIалкъазе лъугьун.

Дур къадаралде данде
Къацандулейги гуро,
Гьадинаб хIинкъучаб ракI
БукIун буго дир каранлъ.
Хирияв Аллагь, дуца
Чиякъгоги тун гьечIо,
ЧагIалъ янгъизлъудасан
ХIинкъулаан бищун дун.

РагIун букIана нилъер
Пикру цо-цо хIакълъулин,
Диралго хIакъикъиял
Гьел лъугьиндал, божула.
Гьанже дирго макьуцин
Радал ракIалде щвани,
Щиб-сундуй къотIичIого,
КъотIула пикрабалъа.

РакI буссанщинаб дица
РикIкIад толеб букIана.
Божилъи хунщиналде
Мугъги рехун букIана.
ХIасратаб гьаб сихIкъотIин
Сверухъ гIуцIун букIана.
Дидаго сверухъ сангар
Сундуйго лъун букIана.

Киналъего хIалги кьун
Ахир сакварай дунго,
Хасаб гьеб дунялалда
Дунго цохIо хутIана.
Хадуб, замана индал
БакIлъана гьеб сихIкъотIин.
Гьелъ рекIей кьолеб лазат
БукIун гьечIо даимаб.

БукIана ригь, гьарун чи
Дир рагьдухъе гIунтIидал,
Гьесий жаваб гьабизе
СихIкъотIухъ гIенеккулеб.
РагIулароан гьаракь
Гьелъ айилан абулеб.
Гьедин гогьдарулаан,
Ригь дир цебе бугилан.

БатичIо дида доб ригь,
Гьоркьоб билун батана.
ХутIана цо сихIкъотIин
КъотIаниги унареб.
Диргун къадар цолъичIел
Дол гIолилаца дие,
НагIана кьурабгIанги,
Кьоларо дие талихI.

Дир къисматалъул таргьа
Багьараб букIун буго, —
Жаниб балебго балеб,
БанагIан батулареб.
Дир гIумруялъул сухъмахъ
Цо сверел букIун буго,
Бакьулъ бугеб гохIица
Гургинлъи дий бахчараб.

********

Хирияй, дир хирияй!
Жакъаги дур корохъан
Чед бежулеб махI буго,
ГIодоб рогьел хъвалелде.
ГIазизай, дир гIазизай!
Кодосан риччаларел,
Дур чIумал цIа-рагIалда
Хъван йорчIана жакъаги.

Мун, корохъеги къулун,
Гъваридаб машгъуллъигун,
Сундулниги пикрабалъ,
Кияли рикIкIад йиго.
Дунги, дур гьеб сипаталъ,
СихI тун, ургъулей йиго.
Дур къисмат-сапаралъул
Сухъмахънухазда йиго.

ХIалтIуе къулараб мугъ
БитIараб къо щвелалде,
Дир кIодо, дурго эбел,
Хвелин хIинкъулаанин.
ХIалхьи-рахIатго лъачIеб
Гьелъул захIматаб гIумру,
ХIухь бахъизе чIечIого
ТIун инин хIинкъун йигин.

Киналго лъимал тIуран,
РакI гIодоб биччан хадуб,
Цодагьал сонал гьелъий
Жегиги ратагиян,
Дур даимгояб гьари,
Дур къотIулареб дугIа.
Хирияй, ракI чIун гьечIищ,
Къабуллъана гури гьеб?!

Гьале гьанже, мун гIадин,
Дунги гьардолей йиго
Лъимал тIуран хадуса
Ратагиян дуй сонал.
Дур гIужде щварай яс – дун,
Ригьда рукъдеги юссун,
Дуй йикIине бокьарай,
ТIаса лъугьа, гьечIелъухъ.

Дур рекIей парахатлъи
Дидасан батичIелъухъ.
Дур гъуждузе, гьир гIадин,
Жегиги дун йигелъухъ.
Дур ригьалъул руччаби
КIодоял лъугьун ругин
РагIарабщинаб мехалъ
Дуца угьулеб хIухьлахъ.

Лъала, йихьула, эбел,
Дир асаразул тIахьал
Кодор ккун, накалда лъун
Пашманлъулей цо-цо мун.
РакI бухIуге, хирияй,
Дие хирияб пиша,
Гьелъ таралгIаги гIужал
Дица нахъа толелъул.

ЛъачIо, лъаларо дида,
Улбул, нуж реэдизе.
Бадибе рецц гьабизе
МалъичIелъул нужеца.
ИнчIо сихIираб рагIи,
Унаро мацIалъ шурун!
«Роржен гьечIел хIанчIилъун»
РикIкIиндал гьел нужеца.

Щибаб ракIалъул асар
Балъголъилъун цIунулей,
МугIрул яс, магIарулай!
Гьедин ругьун гьаюрай.
КIутIбуз шуричIебщинаб
Щибаб хIакъикъат дица
Гьурщулеб буго кочIой,
Бицунеб буго щигIруй.

Дуе гIумру гьарулеб
Гьаб дугIагицин балъго,
ЦохIо Бичасе гуреб,
РагIун гьабуларей дир,
Пикрабазул читIразулъ
Цо суалги бачIуна:
БукIунищ гьаб ракьалда
Дий гIумру гьарулеб рухI?!

********

ЩАЙ КIОЧАРАБ ДУДА?

Гьал нилъер наслу-кьолбол
Хасал хабзалалъе дун
Дагьай гурей щоларин
БадибчIвайги гьабуге.
Дур заниялда цее
КIусизе заман дагьай,
КIодо,мун рехсечIого
Унаро дун аскIосан.

Дол дур маргьабигицин
Уяллъун рихьарай дун,
Уябщинабги билун
Къосунги ккун ятулин.
ГIадамазулъ рихьдае
Ххвелал гьари лъаларей,
Ххвалилаб гьаб гIумруялъ
Дагьай ракIбичIун кканин.

ЙикIана гури, кIодо,
Мунги дагьай тIадагьай,
ТIасан ккечIеб дир тохлъи
БичIчIулаан гури дуй?!
ГьитIинал чагIи, нижер
Цо-цо кIвахIаллъи дуда,
БичIчIулаан гуриха,
Дурги букIанилан ригь?!

РакIалда бугищ дуда,
Нилъер басрияб ригьниб
РухI босаралщиназе
Дица дугIа гьабидал,
Пашманаб кIоченейин,
НекIсиял харбал дуца
Данде дий рицунаан,
Дур гъанситухъги руссун.

Дир лъимадул рекIелъе
Доб мехалъ инчIебщинаб
Гьанже лъугьун,суалал
ГIемерлъун руго дуе.
Мун чIаго йигейани,
Лъала, гьимилаан мун,
Дол дурго маргьабалъа
Макруяй хъартай гIадин.

КIодо, цо лахIзат буго
ХIалхьи дие толареб.
Дуй гьабизе бадибчIвай
Буго дир цо гьитIинаб.
Дун гIумруялъ гуккана,
ГIищкъуялъ ялъаргъана,
Ургъула дун, тIоцебе
Киб дир хIетIе тарараб?!

Бицун букIана дуца
Бицояздехун гуреб,
Бугин цойгидаб асар,
Гьеб гIадабго къуватаб.
Бичас, ракьалда наслу
ТIагIинчIого букIине
Ургъун бугин гьеб рокьи,
Кьал-рагъдацин холареб.

Цоцай щалго кколарел
Рухьулин гьелъ щулаго.
Недегьго цIунанагIан
ЦIикIкIунин, тIокIкIунин гьеб.
ГIумруялде гъира-щавкъ
Гьелъ щвезе гьабулилан,
Щай гьитIинай дун дуца
Анищалъе тIамурай?

Лъана дида цо хIасрат,
Цойгидалъ жиб хисичIеб.
ЦIунун букIана дица
ЦIорол цIа-рагI гIадин гьеб.
Хьул букIана, гьеб дихъе
Даималъ щун батилин.
Божана, дир букIинеб
Дуда цебеккун лъанин.

Щай кIодо, щайха дуда
КIочараб дий бицине
Щибаб ккараб рокьиялъ
Наслу нахъа толарин?!
Лъалаан гури дуда
Гьединги букIунеблъи,
Щай дир бералълъ цIа дуца
Доб мехалъ свинабичIеб?!

Тарана, дун, тарана,
Унго-унгояб рокьи
Дир рагьдухъ гIунтIилалде
Рагьунго гьеб тун букIун.
Гьанже хадуй гъуна дун,
ГIищкъуялъул доб нухде
Гали тIамилалдего
Тохлъун йикIун йиго дун.

Божуларо дун тIокIай
Бицанщинаб харбида,-
Щибго гурияб чIанда
БукIун буго гьаб гIумру!
Дур маргьабицин, кIодо,
Уялилан божарай,
Уяб балагьулей дун,
Ракьалдаго гьечIеб гьеб!

Йихьулищ, кIодо, дуда
Дур занихъе гIунтIарай
Гьаб ракьалда харбие
Дандияв ватичIей дун?!
РагIулеб бугищ, кIодо,
Дир дуесеб бадибчIвай,
Щай жеги гьитIинай дун
Дуца кантIизайичIей?!

Нилъер кьолбол вукIинчIо
ЦохIониги кочIохъан,
Дун йиго! дун лъугьана,
Дуцаги квербакъана.
Амма гьаб дир рекIелъа
Пашманаб гуреб жугьа,
Кинанса ургъаниги,
Бегуларо кагътиде!

Гьединан хъвалеб куцха
КочIол ясазул къисмат,
Каранлъ гIодулеб гIищкъу
КечIлъун къватIиб гьулчулеб?!
ТIулил гьундулъ гьунареб
Бергьараб гIищкъул хIасрат,
Лъанги лъачIогоги гьез
ЩигIрабазулъ бессулеб.

Дидани лъачIо, кIодо,
Гьересияб рагIиялъ
БитIичIеб рекIел асар
ТалихIабилан хъвазе.
Чорхол хIалалъ малъичIеб
Гьимиги лъачIо рекIей,
Гьаракь биччан елъулеб
Къоги бачIинчIо дихъе.

Амма бачIана дихъе
Къадар гуреб цо асар,
Аслу-кьолболъанго гьелъ
Кьурун квегъана дунго.
ИнчIо гьеб бикьун кинго
Би-гьан цадахъаздехун.
Гьел сверун рукIаниги
ЧIунтун хутIана дир ракI.

Щокъай йикIарайани
ЧигIаги гурхIилаан.
Дир гьинал гъварилъуда
Лъийго халлъичIо ругъун.
Щапун магIица цIураб
Чан таптар хъвананиги,
ХъвагIан нахъе унареб
ГIузру буго дир каранлъ.

Гьал нилъер тухумалъул
Хабзалъ дирабго бокIон
Дица ккведал гурони
БичIиларо гьаб тIасан.
Хирияй, тIаса лъугьа
Дур хIалхьи биххаралъухъ,
Гьеб щибали лъаларей
Дир ккараб мунагьалъухъ.

Дир къисмат цебеккунго
Дуда щай лъачIебилан
Мукъсанаб дир рекIеца
Дуй бадибчIвай гьабидал.

********

Бицунге дие рокьул,
Дир гIумрудул анцIго сон
Дие тIадбуссун кьезе
Дур рес гьечIо, гIолихъан!
Лъугьунге дир сакъатаб
ТIулий дару цIехезе,
ЦIар гьелъий – ине тараб
Доб дир гIолиллъи бугин.

КватIана мун!кватIана,
ТIадеги цIех гьабуге:
Дир дангъваяб куц-мухъалъ
ТIулил багьи бахчунин.
ТIоцебе гIумруялда
Дидасан чи барщизе
Бокьун буго, гIолилав,
ГIумруялъ мун дандчIвайдал.

Кьоге суал, босуге
Сурав дихъан жегиги,
Дунгогицин къосунеб
Къисматалъул ясин дун.
ЦIехоге, дир рекIеда
ГIуж тарав чи щивилан,
ГIужилал гурел чIораз
Гьелде ишан босичIин!

Абуге, араб асар
Басриябин, кIочонин,
КIарччамаб мацI бичIчIулеб
РакI кидаго букIинчIин!
Гьеб дур гIадаб къадрулъи
Къасдалъе биччарабго,
Къорикье цоцIул ккараб
ТархъанлъичIин тIадеялъ.

Нервалде тIаде ккараб
ТIухьидул горогIанги,
КваланагIан гIазаб гьелъ
ГIемерин дие кьолеб.
РечIчIаралъусан нахъе
Бахъун унареб чIорлъун,
Балагьаб гуреб къисмат
Лъаларо дир рокьуда.

Дун хадуй лъугьанагIан
Мугъ гуреб дий бихьичIеб
ТалихI дихъе бачIунин
Щаклъула, божуларо!
Абухъе, мун батIияв
Ватула, амма дие
Гьеб цойги «эксперимент»
Кинан ккелеб, лъаларо!

Абуге, хIинкъуч йигин,
Лъала! РагIичIищ бицен,
«Риидал борохь бихьун –
Хаслихъ гIарщикьа хIинкъун».
Гьеле, гьедин йиго дун.
Гьединай лъугьун йиго!
Дир араб гIумруялъул
Гьабуге, вас, бадибчIвай!

Артист, зритель, режиссер –
Киналго гьел дун йиго.
Дир анищазул пьеса
ХIан бахъун, пардав къана.
Къваридаб дир эпилог
Дуеги бокьиларо.
Дуца хъвараб критика
Лъезе гьениб бакI гьечIо.

Бицунге дие рокьул,
Дир гIумрудул анцIго сон
АнцIабго къоно рахан
ХутIун бугин добехун!
КватIана, гIолилав, мун
Дихъе анцIабго соналъ.
ГIумруялъ лъукъарай дун
ЙичIчIуларо дудаги!

********

КIалъай вас ! Абе дида ,
Дир рекIел шагIирилан,
ШигIраби дилъ тIирщине
Гьеб калам гIолеблъидал.
Балагье тIул-ракI рагьун,
Дуй ихтияр кьун буго,
Гьениб тIегьараб бахча
Дуца жан кьураблъидал.

Гьудул, рихьулищ шобал,
Жеги бихьулищ гьава,
Гьулъуй тIавагьуней дун!
Дур хиялаца гурищ?!
Гьарула!гьардола дун,
ЦIуне дие гьал куркьбал!
ЦIуне дир керемалъе
Каклъун лъугьараб асар!

Лъалищ, дир хасалил ах
Дур ихдалил хIухьлаца
ХIеренаб гIурччинхералъ
Бацун бугеб тIубанго.
Ургъел-пашманлъабаца
ГIодор цIарал дир лугбал,
Духъе цIаруцIунаго,
ТIадагьлъун руго лъугьун.

Лъеберилъа ун хадуй,
Хиялаца толаго,
«Духъ валагьун вукIанин»
КIалъана мун тохлъукье.
Балагьун чIун хадуса
Сайгъат багьаяблъидал.
МугIрул ясалъе ригьаб,
ГIужда щварав, дир гьудул!

Гьикъуге, щиб бокьилин,
Бокьараб бицинаро,
Бицун щвараб сайигъат
Дие къабулаб гуро!
Ургъуге дий бицине
Берцинабилан калам,
Ургъелабалъ тIирщараб
Гьеб бищун дий къиматаб!

БитIккечIеб цо асаралъ
Гъваридго жиб лъукъараб,
КигIанго хIинкъаниги,
Рагьула, вас, дуе ракI.
Бакьулъе виччан хадув
Дуцаги рекIкI гьабуни,
Дурго намус букIа, вас,
Дуй хIукмуялъе къади.

********

Дуй хъварал асаразул
Къадарги къосун буго,
Къосунаро пикраби
Дур адрес цIехолаго.
ЦIар рехсон биценалъе
Тавакал гIечIониги,
Таптар гIун буго рекIел
Балъгояб гаргаралъул.

Гьудул, дир берда цеве
Гьимулев тIамула мун,
РагьичIел дир хиялал
Дуда лъалел кинигин.
Дицаго ургъарав мун
Ургъелабалъ вукIуна,
ВукIинчIого гIоларев,
ГьечIого бегьуларев.

Гьаб дир ялгъузлъиялъе
РекIелгъейлъун вугев мун,
Уяв, хIакъикъиявлъун
Рес гьечIо, ватичIого.
Гьаб дир рекIел асаралъ
Авараглъун рехсолев,
Дуца цIилъи щвечIони
БечIала, вас, дир гIумру.

Дир макьабалъ вихьулев,
Ракьалда дандчIваларев,
КидаллъагIан дуца дун
Хаду-хадуй ахIилей.
Хиялал ралъаргъунев,
Балъголъилъун хутIулев,
Балъгояб гьаб рокьуда
БикьигIаго лъаладай.

Жакъасеб гIасруялъул
ГIолилайлъун рикIкIунге,
ГIолилай дун йикIана
Жеги къоабилелда.
Щайгурелъул дида мун
Доб мехалъго дандчIвайдал.
Дир балаялъ доб сипат
Даимлъуй бахъунлъидал.

Дур жаваб щвечIониги,
Цойгидав восуларо,
Дур даражаялде гьев
Вахъиларин шаклъиялъ.
Бахъун рекIелъа кьибил
Гьаб рокьул рехуларо,
Гьелъул гIужал регъолеб
Дарман батунгутIилин.

Къасдазул къилбаялда
Къалъараб канаб цIвагун
ГIодосел гьал чирахъал
Къацандулин кIалъанин,
Гьеб ритIухълъи гурелъул.
Мун цо вуго, вукIина.
РекIкIалъе ракI тIамичIо,
РекIекълъун гьечIо жеги.

ЦIудуй гьабураб хиял
Гъадиде бикьун унищ,
Вокьаравги щвечIилан
Щварав восун йикIине?!
Щобил бакъ цIехолаго
Борхун рехулеб балай,
Гьелъул кунчIи бикъулел
МатIабаз тIаде цIалищ?!

********

АБИЛАРО ЙОКЬАЯН

Дир пашманал пикраби,
Гьудул, дур цо пикрабаз,
Бакъул чIораз хьухьаллъун ,
Риха-хочизарула.
Къваридаб къисматалъул,
Гьал захIматал къоязул,
Дир хвасарлъул горги мун,
МатIуялда бакъги мун.

ВукIа, гьудул, дир рекIел
РекIараб чирахълъун мун!
Мун гьечIони дуниял
Дий къанщилин хIинкъулин.
ХIал кье гьал дир кверазе,
ЦIай гвандинисан къватIий
ГIумруялъ жаний гъурай,
Гъанкъунго тIагIиналде.

КIутIби дир гьиманиги,
ГIунарал чIегIерберал,
Мун вихьиялъ гурони
Балъаргъунаро балай.
Балагьула, гьудул, духъ,
Гьелегьуна дир хIасрат.
ХIал щола дир лугбазде.
Бокьула дие гIумру!

Кив вукIарав, гьудул, мун?
Щай щвечIев гьанжелъагIан?
Дир бераз магIу гуреб,
ГIищкъу къватIиб бецIцIизе.
ЮцIцIине щай тарай дун
ГIумруялъ, канал хIехьлъун?
Дир ругънал регъезе мун
Щай гьадигIан кватIарав?

Абиларо йокьаян.
Йокьа, дуйго бокьани!
Дирго рокьиялъ гъурал
Куркьбазги тIавагьина.
ЦIехеларо дур рагIи.
Кье, хIажатлъилин ккани!
ХIужаби гьечIониги,
Гьадингоги дур йиго.

Гьалъал зодил цIвабзазул
ЧитIралги сокIкIун дица
Дур цIар дирго рекIеда
БухIун хъвана некIого.
РухIула, гьудул, кIутIби
Дур цIар щуранщинахъе ,
Дуца хIасраталъул цIа
Гъунлъидал рекIел гъасда.

********

Абуге, хирияв, дун
Жеги гIолилай йигин,
ГIодулеб рекIел гьаракь
Дуда рагIуларелъул.
Балагьуге бадиве
Берцинайго йигилан,
Бецун тараб ссангицин
ЦIидасан гIурччинлъулин.

Ятила гIолохъанго,
Ятила дун берцинго,
Гьеб кIиялдаго, гьудул,
КIиго гIасру бихьараб.
КIиялъулго батIалъи
Цого рекIеда лъала.
Цого ракI гьеб кIиялъго
БатIа-батIа лъукъана.

РакIбацIцIадаб гьоркьоблъи,
ГIадамалъ гIадан воси,
Унаго цадахъ араб
Дийги, къоабилеб век!
Машина-алат букIун
Цоцай чи хIажалъичIеб,
Къоло цоабилебги
БачIун бегараб дитIе!

Гьудул, кинаб берцинлъул
Бицинеб гьанже дуе,
Дуда бихьулелъулищ,
Я дида лъалелъулищ?!
Бокьуларо, вас, дуе
Дуй йокьулей ясалъул
Дуцаго рецц гьабичIеб
БатIияб доб беринлъи.

Жеги къабуллъуларо,
Къваридаб ракI рагьани,
Дудасан цебе гьениб
Цойгидас лъун тараб гIуж.
ГIенекке, гIолохъанчи,
ГIолилай йикIана дун
ГIумрудул рикьалабаз
РекIел рокьи чIвазегIан.

ЗахIматал лъагIелазул
Лъар бахъизе ккезегIан.
Кодосан борчIун араб
ХIанчIихъ дун гIодизегIан.
Берцинайги йикIана
Гьаб цIияб гIумруялъул
ГIамалал къосун хадуй
Дихъанго йилизегIан.

Хирияв, кинанха дун
Дуй йокьизе бегьулей,
Диего йокьуларей,
Дийго берцинай гьечIей?!
КIванани, вас, гьарула
Божизе гьаейилан
Гьеб кинабго цебего
КIочараб макьуйилан.

Дур бажари гIунани,
Дир божилъи цIилъани,
ЦIидасан, вас, дуй гIоло
Берцинлъун гIолиллъила!

Бокьанищ? Бице цойгияздаги.

Опубликовать в Google Plus
Опубликовать в LiveJournal
Опубликовать в Мой Мир
Опубликовать в Одноклассники

Метки: , , , , , , ,

3 комментария на “Рабият Къурбанова”

  1. Muhammad Saypulahilazul مۇحاماد سايفۇلاهێلازۇل сказал:

    Лъик1го хъван буго

  2. Сапият сказал:

    Раг!абазул ц!акъльи!!!Сахльи кьейги хаду-хадуги гьадинал куч!дул хъвазе

  3. Патимат Ахмедова сказал:

    Ц!алана,ц!алана,цойги нухальги ц!алана.Ц!акъ берцинал,гъваридал,рек!елье унел раг!аби руго.

Оставить комментарий

Подтвердите, что Вы не бот — выберите человечка с поднятой рукой: