ГIайшат Ибрагьимова

Автор: admin     Категория: Айшат Ибрагимова55547 просмотров

Айшат Ибрагимова

Дир рокьи къачIалев къебед мунлъидал,
РакI жагъаллъун бугин жаниве вакке!
Черхалъул устарлъи духълъидал бугеб,
Берзул нур ун бугин, тIад буссинабе!

********

Квешав сихIручияс гьукъунищ ругел
Гьаб дир рокьиялъе кьолел жавабал,
Сабаб хъвалев чияс нахъчIванищ бугеб
Дир гIищкъу тIубалеб къиматаб дугIа?

БацIий гъураб гудур чанийги кколеб,
Чанги дандчIвалел нилъ гьаб рокьул нухда,
Чание битIаралъ бацIгийин кколеб,
Ккела накабазда дида цеве мун.

Биче, рекIел гьудул, черхалъе хIасрат
Дир чалухлъиялъул багьаги гьабун,
Рагьея хазина рекIел балъголъи
Дир божилъиялда ракIги чIезабун.

Мунин чалухдулеб гьаб дир черхалде
Чан гьабе, вокьулев, рокьиги рагьун.
Мунан инагьдулеб гьаб дир рокьуе
Кье, хирияв, жаваб, хал ккун йигин дун.

ГIела гIазаб кьураб чIегIер беразе
Духъ гIащикъал гьезде гьабе цо ишан.
Цинги балъаргъуге каранда рокьи
Кинниги гьеб пулан духъ ккараблъидал

********

Хъаравуллъун чIарахъ ярагъ букIуна,
Те дун хIасраталъул хъаравуллъуда.
МагIарде рахарал чан ккун руссуна,
Чанай дунги йиччай дур рокьи кквезе.

Дур чанида данде чан гьабулаго
Чанги лъукъана дун дур гуллаги щун,
Дир рокьуда данде ягъуларилан
Ругъун дида буго дуцаги лъолеб.

Дун хIалихьат гуро, хIасрат бергьиналъ
ХIалалъ тIамун йиго хадуй лъугьаян.
БичIчIи гьечIей гуро, чIалгIеналъ йиго
Хиянат лъаниги хадуй лъугьуней.

Дуцаго магIарде тIадеги вахун
ТIегь гурищ, гьудул, дун харилъа тIурай,
Гъваридаб ралъдалъе тIиркъун босараб
Жавгьар гурейищ дун салулъе ккарай?

Рикьи меседилал чIегIерал гъалал
ЧIухIдаего хала дуда рихьизе,
Балагьи цIикIкIарал чIегIерал бераз
ЧIорал дуе кьела дихъе вуссине.

Меседил сапуналъ сипатги чурун,
Чалухъго ячIина дур хIал хисизе.
Жавгьарулаб лъеца махIалги гьарун,
Гьабила дуе кеп диде вуссине.

РакI бахъун кьуниги кьолареб рокьи
Кьейилан гьаризе щибдай ургъилеб,
Щиб мацI бицаниги вуссунарев мун
Вуссине гьавизе гьин сундул гъелеб?

Дир рокьи къачIалев къебед мунлъидал,
РакI жагъаллъун бугин жаниве вакке!
Черхалъул устарлъи духълъидал бугеб,
Берзул нур ун бугин, тIад буссинабе!

********

Заман бахъанагIан зум-зум цIикIкIараб
Дир рокьул иццалъул лъим кьелищ дуе,
ГIедегIун анагIан хIинцго хутIараб
ХIасраталда данде гали тIамизе

Дуниялгун гIалам цебе чIаниги
ТIокIав чи кIваричIо, цохIо мун гIела,
Берцинал щинаца цIар чIваниги щиб
Дур чалухлъиялде чучун йикIина.

Дуца квер кьуни дун тIаде яхъина
КъачIай хIасраталъе хIалай вачIине.
Мун дида кIалъани кIвела божизе,
Бице рокьиялъе рекъолеб рагIи.

********

Берал руссаниги юссинчIо дуде
Дирго хIасраталъул хIал лъалебилан.
Черх инагьданиги ячIинчIо духъе
Дирго гIищкъуялъе рекIкI ккелебилан.

Бералъги цIунараб цIадулъги бугеб
ЦIале гIищкъул асар аскIовеги къан,
Рукьбалъги бекьараб бидулъги къараб
Босе дихъа рокьи дандеги вачIун.

Бицине лъалареб цо асар буго,
Гьеб балъголъиялде лъай дудаги нух.
Дун хадуй гъолареб хиралъи буго,
Къосунге,гьудул мун,гьаб рокьул нухда.

********

ХIасраталъ риунел гьал дир бераца
ТIелхалги къан руго къо иналдего,
Рокьи ккун кьабулеб гьаб дир рекIеца
КIулги рахан буго мех щвелалдего.

КъватIиб биччаниги жаниб бахчараб
Жибго те дир рокьи жаниб инегIан,
Берал рагьаниги къанщун чIун бугеб
Къан те хIасраталде рахараб каву.

********

Дир хIасрат гьекъезе къулуларев мун
Къуланадай жеги цойги ясалъе,
Дир гIищкъу босизе бегьулареб квер
Бегьанадай гьелъул рокьуда данде.

ГIадан кантIулареб батIияб хIалалъ
Бокьун буго дуда рокьул бицине,
Чи хадув гъолареб хIохьелги биччан,
Гьудул, гъира буго мунгун кIалъазе.

Дир гъалаз вухьараб рухьенги бичун,
Чияр кIичIикь сордо рогьанищ дуца?
Дир бераз рахараб рахасги ричIун,
Цойгиялъул къвалакь къосаравищ мун.

********

Рокьи ккараб дур ракIалъ дие ричIарал кIулал
Ххвелал гьарулев дуца рахазе хIал бихьула.
Дур чIегIерал бераца дие ритIарал чIорал
БукIинчIеб ххвелги гьабун жалго нахъе руссуна.

Дур ракIалъул хIеренлъи,хIасраталъул чалухлъи,
ХIалица гьеб бахчулебдур черхалъул гIащикълъи.
Дур сабруялъул гучлъи, гучлъиялъул сабрулъи,
Лъиданиги лъалареб лъикIлъиялъул бечелъи

********

Вакъун вугониги кваналарев мун
КигIанго гIассияв гIамал кIудияв.
Къечон вугониги гьекъоларев мун
КигIанго ссабурав сихI тун вукIунев.

Дир гьаб ахIиялъе гIинкълъун чIарав мун
ГIинкъал сах гьарулел тохтур гуревдай,
Дир гьаб рокьиялъе сабаб хъвачIев мун
Рокьуй сабаб хъвалев дибир гуревдай?

Дир гьаб рокьиялъе жаваб кье, гьудул,
Жанисан рекIараб цIадул хIал лъазе,
Дир бицараб рагIухъ гIенекке, гьудул,
ГIищкъуялъул ралъдалъ лъедезе лъазе.

********

Гьал хIикмалъабазул хIорищ лъугьараб,
ХIориние кканин дур гIищкъуялъул.
ГIажаиблъабазде нухищ батараб
Нур чIун бугин диде дур рокьиялъул.

Йокьулилан абе, уйилан щуре
Щай дие батIияб мацIго бицунеб.
Хирияйин абе, меседин хIеле,
Дун тун батIияй яс йокьичIин бице.

Анищазулъ щу лай, пикрабалъ кунчIи
Рокьул макьабазул маргьойилан те!
Къасдазулъе йиччай, хIасраталъулъ те
Гьаб дир рокьиялъул къилбалъун вукIа.

********

Алжаналъул бициндал
Берцинаб сипат чIола,
Сипаталде ругьунай
Дие мун алжан ккола.
ЖужахIалъул бициндал
БагIари цебе чIола,
Дур багIари щварай дун
Щай гьелдаса хIинкъилей?
Мун жибго алжан буго
Аллагьас дие кьурав,
Дир гьаб кочIол балъголъи
Дуда гуро лъаларо.
Цинги жужахIги вуго
Жаваб цIадулаб кьолев,
Кинан гьаб бичIчIаниги
Мунги гьевго чи вуго.

********

Мун гIакъиллъанагIан гIакълу сверулей,
ГIакъилал рагIаби дидаги абе,
Мун чанай анагIан чара бухIулей,
Чалухго хьвадизе дидаги малъе!

Бакъул канлъи араб бецIаб сордоялъ
МоцIрода цIехела цIар лъалелъул мун.
ЦIваби нахъе гъола рогьалил бакъалъ,
Бакъуда цIар чIвала чIор дихъ бугелъул.

Мунги кIалъай, гьудул, дун ёкьулилан
Ракьалда цо гурей йижун гьечIилан.
Цинги абе, гьудул, дир хирияйин,
Хираго мун гурев чIоларин дие.

Бицея цо рагIи, хирияв гьудул,
Хазинаги гьечIин гьелда бащадаб.
Бая хIасратго къвал, дир берзул канлъи,
МагIишатги гьечIин гьебгIан хирияб.

Лъала, бегьуларо дургун гьаб рокьи,
Гьаб кагътидагIаги керен цузе те!
БичIчIула, божула, мун дир гуревлъи,
Ручкаялдениги чучизе йиччай!

Вокьун вукIин гурев, кодов щоларев,
Анищазул чапар, чучуге дие,
РекIелъ гурев аскIоб сордо баларев,
Пикрабазул къирар, къварид тоге дун.

АхIаниги духъе дун ячIинаро,
Дирго чIалгIеналъул чIумал рехила.
Хадув лъугьаниги дун чучиларо,
Чара бухIиялъул хIисаб гьабила.

Бокьанищ? Бице цойгияздаги.

Опубликовать в Google Plus
Опубликовать в LiveJournal
Опубликовать в Мой Мир
Опубликовать в Одноклассники

Метки: , , , , , ,

Оставить комментарий

Подтвердите, что Вы не бот — выберите человечка с поднятой рукой: