Рукъият ГIалисултанова

Автор: admin     Категория: Рукият Алисултанова54396 просмотров

Рукият Алисултанова1

Къаси къватIий яхъун, рагъидахъги чIун,
МоцIрохъ балагьула дур гьурмахъ гIадин.
МоцI сверухъе ругел гвангъарал цIваби,
Дур берзул кунчIилъун лъугьуна дие.

********

ДИЕ БОКЬИЛААН

Дие бокьилаан гьаб ракьалда тIад,
Ниж гьитIинго ругеб талихIаб заман.
Дие бокьилаан гьанже киналго,
Эбелгун эменгун цадахъ ругеб мех.

Дие бокьилаан гьаб ракьалда тIад,
ГIисинал яцалгун ниж расандулеб,
Дие бокьилаан хасалил сардал,
Инсул маргьабазухъ ниж гIенеккулел.

Дие бокьилаан рогьалилъ яхъун,
Эбелалъ ахIулел нижей туркаби.
Дие бокьилаан, гьанже киналго.
Эбелгун эменгун цадахъ ругеб мех.

********

ХIИНКЪАРАБ ЗАМАН

Гьанже дунялалда рохелги гьечIо,
Рохарал гIадамал цIакъ дагьал руго.
Гьанже дунялалда талихIги гьечIо,
ТалихIал гIадамал цIакъ дагьал руго.

ТалихIги рохелги кибха букIинеб,
ХIинкъараб замана бачIун бугелъул.
ХIайванал кинигин гIадамал хъолел,
Хъурумсахъал руго гьанже гIемерлъун.

Дун гьитIинго йигеб доб заманаялъ,
Бицунана нижей чIахIиял чагIаз.
Цо чи рагIулила хъун Москваялда,
Лъимал рикъулила Америкалда.

Гьанже гьебго заман нилъехъги щвана,
Лъарахъ хIорахъ рехун ратула чIварал.
Подвалахъ ратула хIакъир гьарурал,
Жидерго чиясда куц лъаларедухъ.

Огь! БачIараб заман, гьанже хIинкъараб,
Нилъер лъималазда щибдай бихьила?
Огь! БачIараб заман гьанже къваридаб,
Сундаса рохилеб лъалареб заман.

********

ЭБЕЛАЛДЕ

Дир хирияй эбел тIаса лъугьа мун,
Дуда аскIор рачIел ахирал сагIтахъ.
РакIалда къай буго гIемераб хутIун ,
Дудаги дидаги гьаркьоб хутIараб.

Щай хирияй эбел хеккого тарал,
Духъ гIащикъго ругел хириял лъимал?
ГьедигIан вокьулев хирияв эмен,
Щай хирияй эбел къварид гьавурав?

Сордойил абухъе йихьула макьилъ,
Хирияв эменгун цIакъ рохалида.
Рогьалилъги яхъун хал-шал гьабидал,
Гьеб макьуги батун къварилъула ракI.

Бищун къваригIиндал къанщанин берал,
Эбел, яхъа тIаде, урхъун ругин ниж,
ГIемераб жо буго данде бачине,
Нижеда кIолареб дуда гурони.

********

Эбел дир ургъалил гъамас цIун бугин
Жеги лъидениги дица чучичIеб.
ГIемераб жо бугобицинчIон хутIун,
Дуде аскIой щведал бицине тараб.

********

АЛЛАГЬАСДЕ ГЬАРИ

Берцинаб дунял тун унеб мехалда,
РакIалде тIоцибе щибдай бачIуна?
ЧIегIераб ракьалда лъезе ругелъул
Щиб жавабдай кьела гьенире щведал?

Аллагь дуде божи, дуде аманат,
Дур уммат бугелъул хIакъир гьаруге.
Квешаб рахъалдехун гьесизаруге,
ЛъикIаб гIамал рехун тезе гьабуге.

Аллагь дуде божи, дуде аманат,
РухI босулеб мехалъ рехун тоге ниж.
Как базе , кIал кквезе гьесизе гьаре,
Дуниял рагIалде гIунтIулеб бугин.

Дуниял рагIалде гIунтIулеб бугин,
Зиналъи, хIакъирлъи цIикIкIунеб бугин.
Аллагь тIаса лъугьа мун нижедаса,
КантIизаре дуца къосарал щинал.

********

ЭБЕЛАЛЪУЛ ВАЦ

Дир эбелалъул вац! Дие хирияв!
Эбел цее чIола духъ балагьидал.
Эбелалъул гIадаб гургинаб гьумер,
Гьимулеб букIуна кидаго цебе.

Дир эбелалъул вац! Дие хIасратав!
ХIалтIухъабазда гъорлъ къимат цIикIкIарав.
Жив гIадал бихьиназ хIурмат гьабулев,
Лъалареб цIехезе аскIор рачIунев.

Дир эбелалъул вац! Дие вокьулев!
КIудияб чIухIигун бахъула дур цIар!
Дур кIудияй яцалъ, нижер эбелалъ,
Месед бекьилаан, мун хьвадулеб нухда.

Дир эбелалъул вац! Гьарула дуе!
Гьаб дунялалда тIад лъикIаб щинаб жо.
Гали чIван щиналъуб сахлъи гьарула,
Лъабнусго соналъул гIумро гьарула!!!

********

ФАЗУДЕ

Хъвадарухъабазул пагьму цIикIкIарай,
Фазу дуй гьарула щулияб сахлъи.
Сахал кучIдул хъвазе къуват кьейги дуй,
Кьурул кьучI гIадинай Дагъистанияй.

Мун унтун йигилан рагIарай дица,
ЦIидасан ургъалил гъамас рагьана.
Мунгийищ унтулей йикIарай Фазу?
Дуде букIана дир кIудияб мугъ чIвай.

Дир мурад букIана мунгун дандчIвазе,
Дирго хъварал кучIдул дуе цIализе.
Гьел цIалун хадуса дур бугеб пикру,
Бегьулищ дир кучIдул къватIир рахъизе.

Фазу мун йихьизе мурад буго дир,
Мун йитIун гIодой чIун духъ ялагьизе.
Дуй кьезе хIадурал суалал руго,
Лъаларо, дуца дун къабул гьайилиш?

********

МАТIУЯЛДА ЖАНИВ

РакIалда бугиш гьудул,
Мунги дунги дур рокъор,
МатIуялда цере чIун
Цоцада хурхарал нилъ?

Дуца дида баараб,
Цинги дида абураб,
Гьаб къо дуда кидаго
КIочене гьечIебилан.

Амма кий дун аниги,
Дида гьеб къо кIоченчIо,
Дуца баарал кIутIби
Жеги дир цIорон гьечIо.

Дида доб бакъанил гIуж,
Жегиги цебе буго,
Дида жеги кIоченчIо
Дур берцинал рагIаби.

МатIуялде жание
Дун балагьарай мехалъ,
Гьанже вихьулеб гьечIо
АскIов эхетарав мун.

Дуца дида жемараб,
Къвалги жемулеб гьечIо,
Бокьиларо дий матIу
Жание балагьизе.

********

МоцIрол канлъи вуго къаси дие мун,
Къо къалъараб мехалъ бакъул нур вуго.
Дир беразул канлъи, мун гьечIони дун,
ГьечIилан абизе бегьула ракьда.

Къаси къватIий яхъун, рагъидахъги чIун,
МоцIрохъ балагьула дур гьурмахъ гIадин.
МоцI сверухъе ругел гвангъарал цIваби,
Дур берзул кунчIилъун лъугьуна дие.

Гьудул мун вокьула гьаб ракьалда тIал,
Жъеги лъиениги вокьичIев гIадин.
Амма бокьуларо дие бищунго,
Хияналъи дие гьабулеб мехалъ.

*******

Берал руго гьудул, нухай ралагьун,
Мун кида вачIунев, щайдай кватIулев?
РакIги буго гьудул къватIибе кIанцIун,
Мун гьечIони жаниб лъугьинарилан.

Къаси егулаго щола ракIалде,
Радал яхъунаго тIамула цеве.
Сордойил вихьула гьудул мун макьилъ,
Бице, ракIалдего щолищ дуда дун?

*******

Дие бокьун буго духъе йоржине,
Киналго ургъелал нахъехунги тун.
Дие бокьун буго дуда къвал базе,
Дуца каранде къан убач гьабизе.

Дуца къвалги жемун гьабураб убач,
КIудияб сайигъат букIинаан дий.
Амма рикIкIад вуго, хирияв гьудул,
ЦохIо анищазда хутIун йиго дун.

********

Гьудул баркала дуй бецIал сардазухъ,
РакIалде щвеялъе дие хутIарал.
Гьудул баркала дуй гьуинаб харбихъ,
Сардил макьу тун дий сайгъат гьарурал.

ХIалтIудаса вачIун, рокъов щваравго,
Кьижун ятарай дун йорчIизайичIев.
КIоларо кIочене цере чIун руго,
Дуда аскIор рарал талихIал сардал.

********

Гьудул мунгун дандчIван рокъой щварайго,
Рогьунаро сордо, щоларо макьу.
АнцIила микьго сон гIелариш дие,
Мунгун дандчIвачIого, мун вихьичIого.

АнцIила микьго сон! Унеб дир гIумру!
Гьанже кIолебани нахъе сверизе.
Бехе унеб гIорги нахъ буссинаро,
Нилъер араб гIумру нахъе щвеларо.

Амма гьудул дир ракI херлъулеб гьечIо,
Мун ракIалде щведал цIилъун бачIуна.
Дур кIутIбузул хинлъи ракIалде щола,
Щоларев мун вокьун ана дир гIумру.

Бокьанищ? Бице цойгияздаги.

Опубликовать в Google Plus
Опубликовать в LiveJournal
Опубликовать в Мой Мир
Опубликовать в Одноклассники

Метки: , , , , , ,

Один комментарий на “Рукъият ГIалисултанова”

  1. Патимат сказал:

    КватIичIого, тIехь бахъизе хъван батайги Аллагьас…

Оставить комментарий

Подтвердите, что Вы не бот — выберите человечка с поднятой рукой: