Ису МухIамадов

Автор: admin     Категория: Юсуп Магомедов44093 просмотров

Юсуп Магомедов

Дир кочIол мухъазул рехъалъ хъирщардун
Хъамун ун ратула цо-цо жугьаби…
* * *
Хабалъ чIаголъуларес, чIунтизе те ахират,
ЧIухIдай цIар къваригIарас къваркъвазаре туменал

ХЕРЛЪИДАЛ КАНТIАРАСУЛ КЕЧI

Огь магIарулазул согIаб махсаро,
Чан дун гIадинавдай къосинавуна
«Швелеб я швелареб лъалареб алжан,
Щвараб кеп босун лъикI гIумруялдаса »

Анищ гIемераб кьун, гIакълу дагьаб кьун
Вижи гIайиб гурин гIадамасулан.
Гьава гIемер кьурас, яхI дагьаб кьурас,
Бокьанщинаб гьаби мунагьищилан.

Гьекъезе багьана – гIемераз гьекъей,
Бикъизе багьана – гIемераз бикъи.
ГIайиб гьелъухъ гьезде гьабулеб мехалъ
Гьоркьов хутIанани вохулев дие.

Дир иман-яхIалъул хIал бихьулезе
ХIакъаб жаваб кьезе чехьалъ биччачIо
«КIиго рачелги къан» черх квегъизегIан
Квелъ бахъун биччан тей бигьаяблъидал.

ЖужахIалъур гъолел гIемерлъанагIан
Цоцай бикьун бухIи дагьлъилеб гIадин
Бакъвараб цIулаца цIа кинигинан
Дир мунагьаца гьеб гьелегьиларин.

Дирго гIолохъанлъи гIарац-меседалъ
Дунялалда даим гьабилеб гIадин,
Гьал машинабазги модабацаги
Унел сардал къоял къан кквелел гIадин.

Бицана яхIалъул – хIакъалъул дица
Цо тIезабизе жо дийго швезегIан
Щун хадусалабги гьеб гIамал течIо
Бикъулаго дунго къахIан кквезегIан.

Бихьуларелъубе гьеб тIерхьарабго
Вихьулелъув дунго чIезе бокьана
ТIадго кквечIев гIадан цIогьор гурилан
ЦIодорго хIалтIани хIакъ гьечIеб гIадин.

Ругьунлъун ккезегIан рогьо баччизе
Чвантица хIал кьолеб хIакъаб батана
ЯхIалъул нур рекIелъ свине гьабизе
Машинадул гвангъи гучаб батана.

ХIиллаялда цIарги гъалатIилан лъун
Гъуршазде чан гьаби гьунарлъун ккана
Дида рахIат хIалхьи бихьичIел сонал
ЧIун хутIаралилан рехсола гьанже.

Бикъеялъе гIайиб гьакълиде гьабун
Гьакълий гIайибияб гIолохъанлъиян
ГIадамазда кIалги рекъезе гьабун
ЦIогьабазда хIалги рекъезе гьабун.

«Дие», «Дуе» щаян гIадамаз тедал
Дунялалъул гуреб ургъел гьабичIо
«ГIакIа бахъизеян гIел ваккичIелъул»
Какил гIуж цIехезе регIун хутIичIо.

Абула «мукIурлъи-бихьинчилъи»-ян
Дунго гьелъий кигIан кватIананиги
ЛъачIого хутIичIо «Аллагь вугев бакI»
БихьичIого гьечIо бетIер лъолеб бакI.

Харадуниб швараб бихьинчилъиялъ
Бихьиладай дида доб рокъоб рекъел?
Дора цIадираби цIакъго дурусал
Анир дирал гIадин дол хIалтIиладай?

ГIелаан чвантил хIал хIеж борхизеги
ХIалалаб гьечIони къабуллъиладай?
«БетIер хIалтIарасул» хIеренал кверал
ХIажул асвадалда кинандай хъвалел?

ГIадада ккеларо Маккаялде ин
Базарган вахъунги нахъ вусунелъул
Дун «гьоболасул рукъ къачIан ругьунав»
Бегьула Аллагьас анив тезеги.

Ва амма кигIанго кутакавгицин
Бергьун анив тарав инсан ватичIо
Аллагьас гьаб калам кирилъун хъвайги
Илбис къинабизе къуватги къейги.

ТАМАХАБ АГЬЛУ БУГО : – АВАР МАЦI БАКIЛЪУН БУГИН…

ЛъарагIлъиялда ругел магIарул росабалъги
МагIарул мацIалъ хъвараб цIалуларел дандчIвана.
МугIрул лъарал цолъараб Сулахъ гIурул рагIалда
МагIарул махI цолъичIел гIемерлъулел рихьула.

МагIарул яхIалдаса махIрумал гьечIониги
РухIияб тарбиялъулъ тохго хутIулел руго
Тохал ишал гIемерлъун гIадлу биххичIониги
ГIадаллъиялъул цо чIил камурал гIемер руго.

Рахьдал мацIалда хъвараб цIализе лъаларилан
ЦIаруего гIадинан кIалги кIичIун кIалъала
МегIер бегараб мехалъ иман бегараб гIадин
Умумузул ирсалъе хилиплъарал ратула.

Кьурабалъе харичIел хуриб бетIун тIин квинчIел
Тамахаб аьлу буго: -Авар мацI бакIлъун бугин
Улбуз жидей кинидахъ кечIго ахIичIеб гIадин
Рахьдал мацIалдехун гьез мугъ шайзедай рехулеб?

Миллат цIехараб мехалъ Аваравин абизе
Авар мацI лъаларесул ихтиярго бугодай?
АхIулгохIде балагьун берал риччуларесда
Умумузул къохIехьей къадруяблъун кколадай?

Бечелъи щун, чIухIун чи чанги ватизе вуго
Чорхолъ ритIи гIадинаб бутIадулъ цIикIкIин бугищ?
Лъай-махщел камилавги кигIанги ватилаан
Умумузул ирс швечIев швалде шварав вукIунищ?

Адабияталъулги маданияталъулги
Устарзабазул магIдан магIаруллъи букIинчIищ?
Рахьдал мацI бокьичIесе ватIан бокьи щакаб жо
Элъул адаб танани талихIдай насиблъулеб?

МугIрузул курмуздасан каркарун чвахун унел
Чабхил иццазул гугьар буго нилъер мацIалъул
ГIурччинаб ихалдаса рохарал хIанчIазулги
ХIеренлъи-хIасрат жубан буго нилъер мацIалъулъ.

Нилъ ургьирго угьараб улбузул хIухьеллъидал
Кинидаго рагIараб магIарул каламлъидал
Рахьдал мацIилан абун цIарги лъун бугеблъидал
Бегьилищ адаб рехун эб лъаларилан чIезе?

Рахьдал мацIалъ цIалдолеб мацI берцинаб хIинчIалъе
ЦIорол лъела кавуда пикру камилас бусен
ЦIиял харбазул чапар чодаса рещтIунелъул
Чурун квералгун ина кодой босизе данде.

ЦохIо МахIмуд хIалай гIун гIащикъ тIуваларелъул
ГIалихIажихъ, ХIамзатихъ гIенеккизеги ккола
Рокъобгин годекIаниб гаргаралъе гуребги
Маданияталъеги ярагьуна нилъер мацI

ВатIан тун къватIир ккараз къадруялда цIунараб
ЦIуне вац магIарулав магIарул мацIги цIарги!
Метер хвезе батани жакъа хвезе хIадурав
ХIамзатил Расул мунгун гьеб мацIалъин кIалъалев.

ЩАЙДАЙ ГIЕДЕГIУЛЕБ ГIАДАМАСУЛ РАКI

Авалалъулабги ахириябги
КIиго рагIад буго нилъер гIумрудул
КIиябго рагIалда кIиго цIулал чу
Чи гьоркьов течIого нилъ тIад рекIунел

Цоялдаса рещтIун цогиялда тIад
РекIинегIан гьале гьабсагIаталъ нилъ
КIиябго рагIалда кIиябго росу
Цогиялде унеб нухда гьанже нилъ.

Я цевехун вугев я хадув вугев
Ригьалъухъ балагьун лъазе рес гьечIеб
КIудияв гIезе цIакъ кватулев вугин
Ургъел букIарав дун гIун ватарав хех.

Хасалил сардалги роол къоялги
Анкьалин кколаан ун ратарал хех
Лага кIудияб гIей гIолебилан ккун
ГIакълу швезе анищ гьабун батичIо

Унел рачIунел жал къоялилан ккун
Къимат гьезул кквезе кантIун ватичIо
Кидалго хвезеги хиял лъоларо
Хвезе унго вукIин ракI чIун лъаниги

ХутIараб гIмрудуй магIна кьоларо
Къо анагIан гьелъухъ гIащикълъаниги
Киналго нилъ руго дуниял бакьулъ
ГIумруялъул бакьулъ нилъ хутIиларо

ЛъагIалил моцIалги анкьил къоялги
ТIа-тIа росун шола нилъ русунаро
Дунял рагIалдеги сапаралъ унел
Анин рагIилелде русун ратула

Росо рагIалалде сапаралъ унел
Росогоги бахъун нухда регIула
Сапаралъул нухал хехго танагIан
ГIедегIулеб шайдай гIадамасул ракI

ГIедегIараб лъарал кици лъаниги
Балъаргъунеб шайдай цин кьураб гIумру
Хъил тIураб нухдасан хъамун гурого
Гируларогодай машин букIараб

Сухъмахъазда гIурал умумузул вас
Къосараб шай дуда гIатIидаб шагьра
БухIлеб рукъ букIун ахIудги гурев
АхIараб бодулъе кватIулев гурев

ГIедегIизавуна гьаб ракьалъул вас
Ракьулъан кIанцIичIеб кьогьаб лъадаца
ЦIакъ рекIкIаб жо буго черхалъул гьава
Чабхил иццул гуреб лъингун рекъани

Бакъукье кенчIолеб чIурканаб машин
Куйдузул рагъги хIан хIулхIулун лъураб
Хвалил ругънал лъезе рагъда рукIинчIел
РецIел босзе нахъа тушман вукIинчIел

Бахъулареб гIузру чорхолъ букIинчIел
ЧIегIер ракьулъ лъуна бахIарал чурхдул
ТIокIалъ руссунареб сапар бухьине
Бихьараб гIакъуба гIелариланищ

ГIорлъун гьезул ракIал гьалдезаризе
Кьурулъ сухъмахъазда хIетIе таричIел
Напсалдаса цебе намус цIунарал
Умумузул лъимал шай гIедегIулел

МАГIАРУЛАЛ РУГО ГIАТIИРАКЬАЛДА

МагIарулал руго гIатIиракьалда
МагIарул мацIалда жал кIалъаларел
МагIарул ияхIги адабиятги
Адаб кквечIониги чIаго хутIилин.

МагIарулал руго гIатIиракьалда
Кьурулъан бахъараб сухъмахъ бихьичIел
КIалзул калам чарлъун кунеб квен чарлъун
РатIлил мода гуреб мурад гьечIого.

Огь, багъилаб гIамал магIарул ияхI
Мун гьечIеб чорхолъ рухI гIададисеб жо
Доб АхIулгохIалде «Ахульгойилан»
Гаргалаго унеб наслу лъвинебдай.

Нилъер ияхIалъул хIал бихьулаго
Иргадал рахъулел хъулбиги ругин
ГIурус мацI лъалесе авар мацI щаян
АхIизе гьакIкIалел кIаалги ругин.

Нилъер иманалъул щулалъиялде
ЩайтIабазул гьужум къотIулеб гьечIин
ЧIужу ячарасе эбел щайилан
Щурщур баккизеги кватIизе гьечIин.

Нилъер гIакълуялъул къадру-асалда
Гьереси-демократ тенколев вугин
Гъоркьан тIасан къотIун къо бахъанагIан
Къокълъулел ясазул гурдалги ругин.

Умумуца кьурал бусурман цIарал
ГIуруслъизарулел лъималги ругин
Мага, Арсенилан, Алишкайилан
Гьел ралъаргъулезде рагъулел гьечIин.

Я дир диналъул вац, дир миллатцояв
МагIарулав ватун чIухIун гьечIищ мун?
БахIарчияб тарих маданияб ирс
Умумуз тун батун вохун гьечIищ мун?

Чохьол тIалаб гьабун тураладай нилъ?
ГIакълу-лъай мукъсанаб наслу нахъе тун
Мохмохалъ жиндийго гьалмагълъиялъе
ГьолочIвангIатIал хинкI гIадада квечIо.

ГIасияб кьурулъан шагьранух лъезе
ЛъарагI авлахъ къотIун канал бахъизе
Нилъер умумуца рахьдал мацIалда
ЦIодорал асарал гIадада хъвачIо.

ТОГЕ МАГIАРУЛАЛ МИЛЛАТ БИЛИЗЕ

Нилъер гIумруялъе гьаб гIурус калам
Кумекалъе бати нахъчIвалев гуро
Миллат батIиязда гьоркьоб кьолъунги
Лъай бокьаразухъе кьураб кверлъунги

Ккаралъуб бицине лъазабураб гьеб
КкечIелъуб бицунеб гIемер рагIула
Гьадин халалъани хадусеб гIелалъ
ХабатIа бицунеб щибдай рагIила.

Чвантица, хъулухъалъ цIаралъуре ун
ЦIар учузлъарал нилъ киредай щвела
Чохьол эбелелъул каранзул хIухьлал
ХIурмат цIуничIесда щибдай бихьила.

ГIолел-гIолез цIаруй чиярги бицун
Чарлъана гIагараб магIарул калам
Калассал лъугIарал курсал лъугIарал
ГIолеб букIун буго магIарулазе.

«Папа» абичIого «Дада» абуни
Данде вуссунарев инсул къадру щиб
«Понедельник» лъалел «Итни» лъаларел
Лъимал гIезарулев гьесул талихI щиб.

МагIарул яхI рекIелъ чучичIеб мехалъ
Чияр мацI бицунищ миллат цоясе
Умумузул цIар-рецц цIунулеб мехалъ
Эзул ирсалъулищ адаб рехулеб.

Чохьол эбелалъул каранзул рахьгун
Кинида рукIадго рекIелъ чапараб
Чедгин цIам-пералъе «цIакъалъухъ» хисун
Тоге магIарулал миллат билизе!!!

ПЕР БАХЪИЗЕ УНЕЛ МАГIАРУЛАЗДЕ

Цере-цере хъурщун хъирщардилаго
Бахъула магIарул гIолохъабаз пер
Пинкьал рахъун руго огъохъатазда
ХIулун тIутIун руго тIаждал накаби.

МугIрузул цIумалин цIар лъурал васал
ЦIума-гъудухъего рикIарулел куц
Росдал хурзал тохго толарел ясал
Дозул авлахъазда хъирщардулел куц.

МагIарулал нилъго учузги гьарун
Уч-тюбеялде нуж тIокIалъ хьвадуге
ЧIахIил бусеналда сардалги рогьун
СагIдиял лугбузе гIазабал кьоге.

Рилъинин тIад руссун тIад магIарухъе
Умумузул магълъаз ахIулел ругин
Щай бахIарчиясе бахIараб рухI-жан
Вижаралъуб чIахъен чIунтизеги тун.

Кьурул кьватIелалъуй кьалбал риччараб
Кьер-махI хисулареб накIкIил гъветI доба
Цересел гIелазул гIетIалъ лъалъарал
ГIурдаде руссарал хурзалги дора.

ПЕРЕСТРОЙКА

Вай дуда цIар ккаяб цIи гьабун гIуцIи
ЦIогьорасе гуреб дунял кьолареб
ГIайнал малъалъ аяб демократия
Гьерсие гурого икъбал кколареб

Вай дуда цIа ккаяб цIи гьабун гIуцIи
ЧIунтизе гурого хъвай букIун гьечIеб
Байтулман гьадинаб демократия
Гуккизе гурого гьунар гIолареб.

Вай мун гIоралъ аяб цIи гьабун гIуцIи
ГIалхул хъархъазулъги хъачагъ ватулеб
Низам гьечIеб гуреб базар лъугьинчIеб
Мун бегьулел чагIи чанги ратана.

Гьанже зигардунин дун бергьинаро
БачIараб гурелъул бачараблъидал
Иман-яхI загIипал дагь рукIаницин
БакI гьезул гIамалалъ гIемераб ккуна.

Аллагьасул рокъой гьукъун гьечIо дун
Къинабун щайтIангун щукру гьабила
Дун какде ахIулеб баркатаб гьаракь
ГIарцул къваркъвариялъ бикъичIеб гIела.

ДИР РЕКIЕЛ ХИЯЛ

ЖахIдадул къорикье ккун, къец бан дунял гьабулез
«Гьа мун щай тох вугеван» толеб гьечIо дий рахIат.
Хварасул молол гIоркь ккун, хабатIе унелъуцин
Хвалил пикруялдаса ватIа гьавулев вуго.

Цересан паркъун унел, чIухIарал машинабаз,
«ЧIалгIаде щай биччалеб заманилан» ахIула.
Дир яхIалде чан къарал чагъиргин тамахьоялъ
«Бихьинчиясда кодор жал рекъолин» къец ккола.

Унел гьал сардал къоял,сангарлъун чIезарулес,
ЧIухIдае кепалъего квегъе абе дуниял.
Анир гIадин дораги, рукIиналда ракI чIараз
Анищ кканщинаб гьабун, щайтIан чIухIизе гьабе.

ГIизраил малаикас , сайгъат босун жив толес
Таманаб ххазе биччай дунялалъул хазина.
ЖужахIалъул коронив , кеп-гIоркьалда вукIунес,
Кеп босейилан абе аб дунялалдасаги.

Жив вижарав БетIергьан батIияв вукIин лъалес,
БатIияб хIилла ургъун хIулун рехе гIадамал.
Жидер напс инжит гьабун, ругьунлъарал чагIаца,
Чилъи-яхI бергьаразул, гурхIел цIехоге абе.

Цере аразул лъица, аниб рогьел бачIараб
Ахираталда мунагь бегьуларилан абун.
Дуниялалъул рокъоб лъица якъин гьабураб
Намус бацIад бугони боцIи гIемер щолилан.

Щайзедай гаргадулел дунял дагьаб жо бугин,
Гьелъул рагIалдеги щун щивгIаги нахъ вуссарав.
Бицардула ахират абадияб бугилан,
Энире щайха унел щибго кодоб гьечIого.

-Дуниял хириязда хабар бицине лъала,
Херлъун черх нахълъаниги, нахъе балагьуларо.
Дунялалъул хиялаз хадур цIан унел рукIун,
Хабал лахIту бихьизе заманго батуларо.

ЦIогьорин рогьо бани квеш букIунаресдайин,
Кидаго дунялалда жив вукIинилан кколеб.
Намус бацIцIад цIунарав цIукIайин кколесдайин,
ЦIорол гьундух вугев жив, живго телилан кколеб.

Намусалда хIинкъула Бичасдаса хIинкъарав,
Биччараб гьорчо гIадин , гIадамалъ хьвадуларо.
«РекIиндал Аллагь кIочон, рещтIарабго чу кIочон»
РекIей бокьараб гьабун ракьалда хьвадуларо.

КIалдиб тIокIгIус гIадинан, гIадамалъ рукIунаро,
ГIагарлъи цIунулелъуб, гIаданлъи кIочонаро.
Аллагь цо вукIиналъул, намус цо букIиналъул
ЛахIзаталъцин каранда пикру гъапуллъуларо.

КигIан цIакъ яхIалдаса , рухI цебе гьабуниги
Гьеб чорхолъ цIунун чIезе, гьунар кьурав щив вугев?
Халикъас гIадамаллъун гIадада рижичIелъул,
Гьеб нилъелъго цIунизе, нилъго щай кIарчанлъулел.

Кинида рущун цоял, молода рущун цоял,
КIиязаго гьоркьор нилъ, ракьал сабаблъун кьалда.
ЧIагоялъ хварал руго , хваралъ чIагоял руго,
Гьелъие магIна кьолел кьерилал дагьлъун руго.

Соназул болъодул хIокI- лъабкъого нахъа тана
Метералде тIамун тун , таманаб гъоркь хутIана.
Херлъулев вугин дунан кIалалъ абичIониги,
КIанцIун тIаде рахъунел гIолохъабаз бицуна.

Цебе-цебе гIадинан компаниязде гурев,
Мавлидазде дун ахIун , рачIараца бицуна.
Чияда яхIал гъезе, гъира цIакъав дун пакъир,
Дидего къо ккарабго къватIивгIаги чIвачIони…

Бокьанищ? Бице цойгияздаги.

Опубликовать в Google Plus
Опубликовать в LiveJournal
Опубликовать в Мой Мир
Опубликовать в Одноклассники

Метки: , , ,

Один комментарий на “Ису МухIамадов”

  1. Мух1аммад сказал:

    Лъик1ал куч1дул хъвала Юсупица, хут1аралги лъезе ккела гьанир

Оставить комментарий

Подтвердите, что Вы не бот — выберите человечка с поднятой рукой: