Джамиля Пахрудинова

Автор: admin     Категория: Джамиля Пахрудинова46828 просмотров

Dzhamilya Pahrudinova

Гьанже дица духъе саламги босун
«Самаалъул накIкIал» ритIулел руго.
Дур хабарги босун дихъе щвайилан
«Шамалъул гьороде» гьарделей йиго…

********

ГIедегIун арай дун, кватIун щварав мун,
ТIад руссун сапаралъ нилъ кире инел ?!
Лъехъ гIащикъай дунги, гIор ххалев мунги,
Хиялаца гьанже кире рачинел ?!

Мун мугIрул каранда кодоб тIамургун,
ТIад юссаян дие сарин бачунев.
Дун гIорол рагIалда, гIодоблъиялда,
ГIагарал кучIдузде керен чучулей.

Кире, дарман, гьанже нилъ тIад руссинел,
ТIерхьун араб бакъги, къокъараб ихги?!
Хиялаз гьанже нилъ кире тIамилел,
ТIупун лъураб накIкIги, рекIкIаб хаселги.

********

Дир хирияв Аллагь
Мун тIаса лъугьа
Мунагьал гIемерай
Дур лагъалдаса.
Лъунге , Аллагь, борцун
Дир гIамалалда,
Рихинабе дида
Дуй риханщинаб.

Дир хирияв Аллагь,
Мун кIочон тара
БукIинчIо цо лахIзат
Дир гIумроялда,
Къварилъи рещтIани
Щукруги гьабун,
РакI боххун йигони
Гьабуна дуй рецц.

ГIодой бетIер къулун
Тавбу гьабула,
ТIасса лъугьа , Аллагь,
Дун дур лагъ йигин.
Мекъи чIчIараб хIетIе
Босараб гали
Дуца хIалал гьабе
ХIал кIолев Аллагь.

КарагIатабилан,
ХIарамабилан,
ХIалимав БетIергьан,
ТIасса лъугьун те.
Бегьуларебилан,
Мунагьабилан,
РахIмуяв дир Аллагь,
Дуца борцунге.

Щукру дуе буго
Щибаб лахIзаталъ
Дунялалда кьурал
Гьал нигIматазухъ.
Рецги дуе буго
Гьаб дунялалда
Буссурман диналда
Дун йижаралъухъ.

Дуе суждаялда
ЧIван бугин бетIер,
ЧIваге, Аллагь, нахъе
Гьабураб дугIа.
Къилбаялде йиссун
Гьарулеб бугин,
Гьабе, Аллагь, къабул
Къаси дир тавбу.

********

Маххул нухда унеб поезд киниги
Унеб буго гIумро гIадамасулги.
Цин сас тун сабурго, цинги хIалакун,
ГIедегIунел руго гIумродал сонал.

РекIун йиго дунги билет гьечIогон,
ЧIобого хутIараб цо купеялда.
Авал батулареб, ахир лъалареб,
Сапаралда йиго гьал щинал соназ.

Меседил гъалазде гъалайги кканин ,
Лъелародай ахир гьаб сапаралъул.
Дунго йигеб «купе» чIалгIунги бугин,
ЧIелародай «поезд» дун рещтIинегIан.

********

ВорчIами, хирияв, ячIун йиго дун
Арал дол соназул саламги босун.
Дудаса бахчараб берзул кунчIигун
Каранда багъулеб гъобго асаргун.

Гьале,дир гIагарав, данде чIвана нилъ
Санал гIемер индал гIагараб росулъ.
Добго сухъмахъ нухда,росо рагIалда
Риидалил къоялъ къалъул гIужалда.

Добго тIабигIатги, долго тIугьдулги
Ссанда расандулел гогьал кьагIиги.
Кьиндал къогIан хехаб гIолохъанлъиги
РакIалде щвеязулъ щибаб лахIзатги.

Мунгун данде чIвачIей, ургъел бикьичIей
ЯчIунарищ даим макьилъ дун цее?
Пашманал лахIзатал гIахьал гьаричIел
Пикрабаз вачинчIищ чанги дир кIалтIе ?

********

Рузманги, хамизги, хирияб гIужги
ГIадада биччалев гIабдал гуревдай?
ТIадал тIагIаталги, тIокIаб зикруги
Жагъалго гьабурав жагьил гуревдай?

Гьуинаб макьида боснов кьижарав
Макьу бачIинебдай ракьул гвандиниб?
Кьер-кьерал нигIматаз гIорцIизавурав
ГIамал рекъелебдай гIакърабазда гъорлъ ?

Хайир гьечIеб рехсон, рес гьечIеб кьолон
Кьелеб киндай жаваб «кансиларалда» ?
КарагIатаб бокьун, бокьилеяб тун
Бокьухъе теладай ахираталда…?

********

БагIар айгъиралда чангит барабго
Чанги гIоркьиласул гIамал хисулин.
Хисарабищ, гьалмагъ, дур вукIа вахъин
Хъалабазда жани хъулухъ щварабго ?

Пачалихъалъул чу рекIинеги щун
Чодул кьолониве кьуркьударавищ?
ТIад цIар чIвараб хъарщи кIалтIаги кьабгIун
ЧIухIадго михъазда квер бахъарабищ ?

Нагагь мискинав чи нухда ватани
ВихьичIев хвел гьабун кьурун вуссунищ ?
Жиндир къваригIелалъ пакъир вачIани
НуцIил кIалтIасанго тIовитIаравищ ?

«Пайда гьечIел» щинал дорегIанги цун
ХIакимзабаздехун хIел-хIел гьабунищ ?
ГIадатлъи-гIаданлъи гIодобги рехун
ГIадамаздаса мун рикIкIалъаравищ ?

Ворегиха,гьудул, хехаб бартиялъ
Чанги мун гIадинав гIодов реханин.
Жакъа гьаваялда, метер гIодосан
Дудасаги цIакъал хьвадизе кканин.

АскIой рачIаразул къваригIел тIубай,
Къо ккун бихьаразде аскIове ворта.
КIвараб кумек гьабе гьарун щваразе
Щибго пайда гьечIеб дуниял бугин…..

********

Хирияв, магIарухъ накIкIул цIун бугин,
Мун рикIкIад вукIиналъ букIинебдай гьеб ?
ГIиссин цIад цIцIурдузде кIетIелеб бугин,
Дир ракI дуде щвеялъ щенолеб дай гьеб ….?

********

Квачарал куркьбалги хьвагIезе гьарун,.
Гьури буго жакъа сверун женжелеб.
Бадибе балагьун надалда баун,
Дида бичIчIулареб рекIел щаклъигун…

********

Мун бакъ вуго , гьудул, дир къисматалда
Дунги дуда аскIой бакъул чIор йиго.
Мун ихдалил цIцIадлъун щенелев вуго,
Щубил цо къатIралъун дунгоги йиго…

********

Риидалил хинлъи хилиплъарай дий
Хасалил цIороялъ цIоб гьабилебдай?
Къад бакъул кунчIиялъ кан гьукъарай дий
Къаси моцIрол канлъи камиллъилебдай.?

********

ХъахIаб гормендоги горбода жемун
Дур кIвар гьабичIого уней йиго дун.
БагIар мачуяца гIодоб лъалкIги тун
Къо лъикI гьабичIо6он къан тана нуцIа

Елъун ялагьила дун дур бадие
Дир гирулеб магIу бихьиларедухъ.
ЧIухI-чIухIун ина дун дуда аскIосан
Гьаб дир угьдилеб ракI рагIиларедухъ…

********

Свараб гъанситодухъ квачалей йикIун
Хинлъилародай,- ян рещтIун йиго дун.
ТIерхьун унеб моцIрохъ гордухъан яккун
Лъалхъилародай,- ян хал ккун йиго дун.

Свараб гъанситодухъ квер квалунилан
Рохъдол цIун гурони цIаялъ хинлъичIо.
ТIерхьун унеб моцIги, дун урхъанагIан
Ине тIадаб бугин , тIадго буссинчIо……

********

Мун киве ,магIарулав ?
МагIарда чали чIвазе.
МагIарда чали дуй щай ?
Щенон тIаде цIад базе.

Мун киве , магIарулав?
МагIарда ах гьабизе.
МагIарда ах дуй щайзе ?
Дуе сайгъат гьабизе.

МагIарда бугеб ахил
хайир кинаб дай дие ?
Гьениб бан тараб чали
Бичун унеб дай гIарцухъ ?

Канаразул чIинкIиллъи
Щай сайгъат гьабулареб,
Анталиялъул курорт-
Гьений щай ячунарей ?

ГIарацгин меседалъухъ
Дагъистан хисиларо
Канаразул ракьалъухъ
Инсул ватIан кьеларо.

МагIарда бугеб чали-
ЩуцIвайилаб дир отель,
Сверун гьабун тараб ах-
Анталиялъул курорт.

ТIаса лъугьа, дир гьудул,
Мекъи кколей ятанин,
ГIайиб чIваге, хирияв,
Дирги пикру хисанин.

Дир гIумро жаниб араб
Хисиларо Дагъистан,
МагIарул улкаги тун
КIваричIо цойги ватIан.

Дуца бараб чолоний
Чанлъун жаний сверила,
Сверун бугеб ахиний
БурутIлъун ясандила.

********

Жеги макьилъгицин дида вихьичIев,
Салам , магIарулав, дир рахъалдасан.
«Щиб хIал бугеб»- йилан дида кIалъачIев,
Къабул гьабе калам гьал мухъаздалъун.

Жаваб хъвай-хъвангутIи гьебги дурго иш,
Гьабиларо гIайиб хъвачIонаниги.
Ва амма лъаларев дур пикрабазда,
Щай яли лъаларо ятана жакъа.

Мунгун гаргадана, ургъел бикьана,
РикIкIаде ялагьун дагьай гьимана.
ГьедигIан гIакъилав, гIамал рекъарав,
Кив вукIаравилан дуда гьикъана……

********

ЯхIги бичун дица дур бечелъи босиларо,
Дур шагьраялъухъ хисун дирго сухъмахъ кьеларо.
Кьоге меседил мугIрул,гIей гьабила дагьалда,
Аллагьас дунги рахIмат камун течIо ракьалда.
ГьацIул тIалаялдаса тIогьол ахго бокьила,
Жавгьар якъуталдаса къадро тIаса бищила.
ЧIахIил гулалъухъ хисун тIогьол квацIи кьеларо,
Бакъул чIоразда чIухIун дур кан кодоб кквеларо.
Ицул лъимги цебе тун гIорухъа дад цIеларо,
Дур гIатIгояб цIулада дица цIа бакиларо…….

********

Дун хадуй гъоларо-щайзе гIадамал
Нухлул рикьи гIадин рикь-рикьун унел ?
Жакъа цадахъ ругел щай метериселъ
РихьичIеб ххвел гьабун кьурун руссунел ?

Щай салам кьолареб, тIаде щоларел,
Щиб хIад бугеб,- йилан зай ахIулареб ?
Берцинаб гьимигун, гьуинаб калам,
РакI рагьун цоцаде щай гьабулареб ?

ЖахIда — хIусуд щайзе , ракI хъублъи щайзе,
Лъабго къогIан къокъаб гьаб гIумроялда ?
Нахъасан гаргади, цоцаде какдей,
Хадуй гъоларо дун — щайзе гьеб нужей…..?

Бокьанищ? Бице цойгияздаги.

Опубликовать в Google Plus
Опубликовать в LiveJournal
Опубликовать в Мой Мир
Опубликовать в Одноклассники

Метки: , , ,

Один комментарий на “Джамиля Пахрудинова”

  1. Расул сказал:

    Огь,эбел гIодаяб ГIакаромегIер,
    ГIадра тIад бижичIеб мун йижизегIан.
    Божарав хутIичIеб хундерил тIалъи,
    ТIулил ракI бигьинчIеб мун гьимизегIан.

    Баркула яц,Жамилат!Хадур г1емерлъаги!)

Оставить комментарий

Подтвердите, что Вы не бот — выберите человечка с поднятой рукой: