Загьрат МухIамадова

Автор: admin     Категория: Заграт Магомедова49707 просмотров

Заграт-Магомедова1

Дирго напсалъулгун рагъда йиго дун
ГIодоб тIечIониги, бида ецIцIулей
Къосараб илбисгун кьалда йиго дун,
Къезе чIечIониги, бергьине кIвечIей

********

ТIАСА ЛЪУГЬА, ГIАДАМАЛ

Дидаго лъан ракьалда лъийго квешлъи гьабичIо
лъачIого лъугьаралда тIаса лъугьа гIадамал
Рекъарал барщиялъе гъоркьчIалие лъугьинчIо,
МацIалдасан борчIараб, гIенеккуге,гIадамал.

Мекъи бихьараб бахъун нахъасан гаргадичIо
Нагагьаб рагIиялъухъ гIазаб кьоге, гIадамал
Ургъунго хIалихьалъи дидасан бажаричIо
Божуда рекIкI батани, рикIкIад гьае, гIадамал.

Чияр буголъиялда лъан кверщелги гьабичIо,
Ризкъиялъул бацIцIалъи балагье нуж, гIадамал.
ГIемер жоялда хадуб каранда ракI хапичIого,
Бечелъи дагьайилан данде чIоге, гIадамал.

ХIал гьабун дун йокьаян кIалъалей гIадан гуро
ГIантаб хьвади – чIвадиян бугьтан лъоге, гIадамал
Рокьарал данделъизе дица квал – квал гьабичIо
ГьечIел гIайибал чIвазе гIедегIуге, гIадамал.

РекIелъ асар лъугьиндал, хъачIго кIалъан ятани,
Дун гьелда рекIекълъана, рекIелъ ккоге гIадамал.
Цо нухалъгIаги нужой кумек гьабун батани,
Арал къоязул роххел кIочон тоге, гIадамал!

********

ГIИЩКЪУ КЬЕ АЛЛАГЬ!

Цо лахIзаталъ нахъе гъезе кIваниги,
Кверщел гьабун буго кочIоца рекIелъ.
РикIкIаде гьарилин дун ургъаниги,
Гъенон – щущан руго жугьаби чорхолъ

Жаваб цIехолеб къо гIагарлъаниги,
Лъалеб гьечIо чIезе цохIо пикру ккун
Панаяб дуниял бичIчIананиги,
Бажарулеб гьечIо Бичасде юссун…

ГIарзлъун тIаде лъурал какил ШурутIал
Камилго тIуразе къуват кье, Аллагь!
Къаникь нурлъун чIолеб гвангъараб Зикру
РекIей гIагарлъулеб гIишкъу кье, Аллагь!

********

КАНТIЕ ДИНАЛЪУЛ ЯЦ

Шагьар бакьулъ бугеб кIудияб мажгит
Как ахIулеб гьаракь рагIулеб гьечIищ?
Долго саназ гIадин сипатги сурун
Унел руго къоял къокъаб гIумрудал.

ГIадада бичаге кьураб замана
Гьабе тавбу, дир яц, рекIелъ йигилан
Дицаги гьабуна бацIцIадаб тавбу
Къабул гьабиялда кIудияб хьулгун.

Мун берцинай йиго, гьайбатай йиго,
Ислам къагIидаялъ ретIа – къарай яс
Лъалареб нур буго дур бадиб кунчIун
Лъалхъун балагьула, борцунареб ас

********

ВАГIЗА

Бихьулареб кваркьи тIадеги бачун
Улбуца рахчула жодорго тIанчIи
ТIаде къо кканиги, рухIелги хIехьон,
Улбуца хьихьула гьарурал лъимал

Бабал лъималазде букIунеб рокьи
Гьезий рохел свиндал тIурулеб макьу
Гьел цIунизе тIаде бачунеб кваркьи
Гьезда хъвараб цIадул улбузе боркьи

Дир ясал, гIенеке бицунеб харбихъ
БетIергьанас дунял бижаралдаса
Улбузул ракIазде лъимадухъ рокьи
Кьун буго ракьалда бищун къуватаб

Улбул лъималазул гъалатIаздаса
Рахчун течIониги, тIаса лъугьуна
Гьезий бахьи гьарун бетIергьанасда
ТагIаталда хадуб дугIа гьабула

ГIумру кьуралъ кьураб гIакълуги босун
Берцинаб тIабигIат куцай чурхдузулъ
Чияца къо бихьун данде гьабураб
Нужой хIарамлъулеб цIуне бутIрузулъ

Дир бицун лъугIараб гьаб хабаралъухъ
ГIинтIаме, хириял, пикруги гьабун
Гьабизе хIал гьечIеб гьаб вагIзаялъул
ХIисаб гьабе, ясал, тавбуги гьабун

Тела нилъецаги берцинаб дунял,
Цадахъ босулеб жо щуго бозил хъал
Багьа кьечIеб щвела ахирияб рукъ
Къанабакь бихьила киназулго хIал

********

МУТАГIИЛАЗУЛ ДУГIА

Кумек гьабе нижей, мугIалимзаби,
РекIел пикрабазда кверщел гьабизе
Квербакъе нижее, цIодорал тIахьал.
ТIабигIат рекъараб гIамал куцазе
Исламияталъул къебелъиялда
Къоял тIамизеги рачIун гьечIелъул
ТIадчIун цIалдеялде цIай нижер ракIал
РекIелъ иман тIолев, БетIергьан – Аллагь
Гьаруге, БетIергьан, гIамал мекъаллъун,
Мекъи хIетIе лъолел бахьикъосаллъун,
Мун разияб бикье нижее баркат,
Баркат гьарзаязул гьабе шапагIат
ГурхIе дунялалда – ахираталда,
Ахир – къадги бахъун унеб рухIалда
Къанабакъ рещтIараб сордо – къоялда,
СиратIалъул кьода лъолеб хIатIида

********

ЗАГЪАЛАВ ЩАЙИХАСУЛ ХАБАДА

РекIел щибаб кIутIи тавбуян буго
Хириял моцIазул хIурматги гьабун,
Загъалав дибирил хабаде щвана
Цере квералги ккун росдал имамас
ДугIа цIалун, гьесий салам гьабуна.

Сверухъ ругел занал иххаз ккуниги,
ХисичIеб хобалъухъ хаган чIун йиго.
ГIурччинаб гIатIласалъ бахчараб гохIалъ
ГIемераб жо балъго гьабулеб буго.

Бицине лъаларел асараца ккун
Дун арал гIасрабалъ рехулей йиго.
МуридзабИ сверун, Генуса Шамиль
Загъалас имамлъи баркулев вуго.

Жакъа гьесул зонохъ балагьун йиго
Пикру гьабулезе гIураб къварилъи
Дир тIолго черхалда гъар – гъар бан буго
Метер юссинесеб гвандил гъварилъи

Аллагь, тIаса лъугьа гъалатIаздаса
ЛъачIого ккаралги, къосун аралги.
Иман загIиплъарал каказдасаги,
КквечIого ричарал кIалаздасаги

РекIел щибаб кIутIи тавбуян буго,
Тавбу къабул гьабе, хирияв Аллагь.
Дир кIутIбуца дур цIар шурулеб буго,
ЦIадул бухIи лъазе тоге, БетIергьан.

РетIизе ретIелни рекъезабунин
Рекъеладай Аллагь дир гIамалалда?
Цадахъ босулебни данде гьабунин
Гьабиладай гурхIел ахираталда?

Дунял гьабулаго гьоркьоб хутIараб
Хирияб гIибадат дагIбадиладай?
ГIамалалда рекъон гьабизе кколеб
ГIазабазул хIукму цебе ккеладай?

Кинабго гьабураб данде бачунеб
Чара бухIараб хIал киндай хIехьелеб?
Кагъталги кодор кьун рикь – рикьулаго
Кинаб рахъалдедай бихьизабилеб?

Дида тIаса лъугьа, рекIел гIагарлъи
ЛъикIлъи гьабизе дир рес гьечIониги
РештIинчIого чIоге, рухIиял гьалбал.
Гьоболлъи гьабизе регIичIониги

Нужода ресукъай дун ятанани
ЛъикIлъи цойгиязе гьабун батула
Гьоболлъи гьабизе заман гIечIолъи
Цере щварал гьалбал тIоритIи ккола

Дун кватIана, устар, духъе ячIине
КъачIазе ккараб дир ракI бугониги
ГIужда кIутIичIо дун дур гьеб нуцIида
Мунагьазул цIураб рухI бугониги.

Дуца къачIай, устар, гIадалаб дир ракI
Тавбуги кIочон тун, чIунтизе тоге.
Дир рухIияв эмен, куцай дуца рухI,
РекIкIаб Илбисалъе квегъизе кьоге.

КигIанго Исламалъ ахIи баниги,
РекIел гIундузда гьеб рагIулеб гьечIо.
Чанги мугIжизатал рихьананиги
РухIаял дир берал кантIулел гьечIо

Гьаб рагIулеб гIинкълъи сахлъизабизе
Устарас дий кумек гьабилародай?
Гьаб бихьулеб бецлъи тIаса босизе
Муршид, дур квербакъи дий гIелародай?

********

Лебалай эбелалъ хьихьананиги,
Дунгоги кIвахIалъул асир йикIана
Исламияв инсул рокъой г1униги,
ГIунгутIабиги дилъ гIемер квалана
«Кинацаго» гIадин ретIелги ретIун,
Дица Илбисалъул ракI гъезабуна
«КIазал лъаларезул» мухъилъеги ун,
МалгIун дидехунго гьесинабуна
БетIергьанасукьа хIинкъананиги,
Мунагь батиларин дунго гуккана
ГурхIел цIикIкIарасул рагIананиги,
РатIлил тадбиралъе инкарал ккуна
Дир гIумрудул заман гIадада ана,
ГIодоб нодо тункун какал тIурачIеб
Бахилаб сахаб мех гьорохъ бичана,
Исламалъул рукну – кIалал кквечIого
Гьанже гьел рецIулел санал аниги,
ХIинкъи кIудаб буго къабуллъиларин.
Тавбу гьабун ретIел хисананиги,
Соролеб буго ракI нахъе чIвалилан.
Огь, дуда гурхIизе мустахIикъаб гIел,
Илбисалда рекIун санал рикъараб
Иман загIипазул саламатаб тIел,
ТIадегIанас лъурал фарзал тIурачIеб
Умумузул гIакълу гIадахъ босичIел
Къабул гьабиладай кватараб тавбу?
Тарихалъул жилдал жагьилго тарал
ТIаса лъугьинадай нилъеда Аллагь?

********

ШаргIалда рекъараб ретIел ретIарай
Дуда тIад лъолелъул пикруги гьабе:
РакI тIокIкIараб тезе, мацI бацIцIад кквезе
Дурго нафсалдаги кверщел гьабизе

ХIатIилги ихтияр духъго бугелъул
Рахъуге галаби кколарелъуре.
Беразул кверщелги кверщаликь тедал
Балагьуге, дир яс, мун гьукъаралде

РикIкIад гьабе Илбис, мун къосинаро
Гьелда мугъ чIван уна гIемер мунагьал.
ТIокIалъ гьелъие мун мукIурлъуларо,
Гьеб сабаблъун ккола квешал гъалатIал

Дунялалда кинабго рекъезабизе лъалел
Рекъеларо къанабакь нужедаса ахират
Саунаби – казино кинабго кодоб бугел,
Заманаялъ телалде рекIелъ бичай насихIат

Бусураби – бихьинал!Нуж беццалги гьечIелъул,
Квещабщинаб гьукъизе дандечIеялъе рахъа!
Ракьалда кверщел бугел къадруял гIолохъаби,
Къадаралда мал базе замана щвечIищ жакъа?!

Миллатал пасалъизе руц1цIухIун разилъарал,
Сордо рукIкIараб гIадин щвезе бугеб хвел тIаде
Хабалъ сурав босизе малайкзаби рачIиндал
ЧIабаралда регараз кинандай жаваб кьелеб?

********

ВАСИГАТ

Васигатги хъвана нахъ хутIулезе
Дида хадур гIемер гIодугейилан
Амруги гьабуна дир ясалазе
Росдал гIадатазе хисугейилан.
Хваразда кинабго лъалин абула
Дирги рухI бачIина ахIвал – хIал цIехон
РухIал рахъаниги, гIакълу толила
Макьабалъ яккила, кколелъул бицун
Бищун кIудияйги, хадур гIолелги
ГIечIей ПатIиматий хIалае рата
ГIакълу цIубаразги, гIамал мекъазги
Эмен вихьичIелъе чIаголъи гьабе.
Ракьалда рижарал ракьулъ унелъул
Нужорго напс квегъе, хириял ясал.
Какилъ иман лъалъан, кIалккун лъадарун
Дурусго къачIай нуж ахираталде.

********

САБРУ

Дир хириял ясазе сабру цIикIкIараб кьеги,
Гьеб гьабун бужарани баракатги гIемераб
ГIемералде хьул лъуни сабруялъ сабру кьола
Бечелъиялде цIани, гьелъ чIолорхъо нахъ цIала.

Рокьараз рекIкI гьабуни, ракI – макI гьабулеб сабру
Сунареб рокьи ккани бигьа гьабулеб сабру
Квешаб асар хъинтIани, сабруялъ нахъе гъола
Илбисалъ квер битIани, сабруялъ бачахъула.

Ракьалда гIадамазул сабру букIичIебани
ЧIалгIадечан гIумрудай гIададаго инаан
Дидагоги гIемераб сабру гьабизе кIвана
КIоларебги хIехьезе сабруялъ къуват кьуна.

РухIел бакIлъараб къоялъ сабру цIакъ хIажалъула
ХIажалъи ккаралъубе сабруялъ квербакъула
БакIаб гьир тIад бегидал сабруялъ къо борхула
Къадар тIаде щвезегIан Аллагьас сабру кьола.

********

Тохлъидал цIалулеб хирияб аят
Лъицадай цIалилеб дир къаданив чIун?
Къо бачIинелдего, хъвараб васият
Лъицадай рагьилеб, магIуги бацIун?

Дир молол гIоркьги ккун, хитIаб гьабизе
ГIагаразда цеве щивдай вахъинев?
Хабада чадир чIван, къуран цIализе,
ЦIаларазда гъорлъан лъидадай ккелеб?

Гъаримлъун хутIарал дир ясалазе
Эбеллъи гьабизе щийдай ячIиней …
Адабияб рокъой къокъарай дие
Аллагьас кинабдай къачIан батилеб?

********

Исана дир горда гъоркь бакъвана куракул гъветI
Гъенана гьелъул тIогьиб цохIо тIегьараб гIаркьел
Инсанасул ахираб рухI босулелъул гIадин
Дий къо – мех лъикI гьабизе тIегьарабдай букIараб.
Инсуца чIун букIана, дида ракIалда буго ….
ГъутIби хирияв эмен цевего ракьулъ вуго
Огь, мунагьал чураяв, гъутIби херлъулел руго
Цо – цоккун дуда хадур гьелги ракъвалел руго.
Дуца чIарал гъутIбуца чанги нигIматал кьуна
Баркалаги кириги чанги дуеги щвана
ГIумруги унеб буго, дир гъветIги гIолеб буго
Дуе гIадин баркала дие щвеладай гьелъухъ?

********

Инсудасан сурав босулеб къоялъ
Мунги букIа нугIлъун, как балеб гамачI
ЛъикIаб квешаб гIамал борцунеб мехалъ
Мунги бахъа нугIлъун, цIулакьодул гъветI.

Дуцаги квербакъе, инсул какикьжо
Дос нодо тункиялъ хIуларабин мун
ХIалае лъугьа мун, цIалараб Къуръан
ГIемер гьес бегиялъ басралъанин мун.

ХIежалъул чIумалги досул рукIинчIо
Замазмалъул лъимги инсуе щвечIо
Аллагь, хъван батаги ахираталда
Алжанги замзамги хирияв инсуй.

********

Абула хведалги рухI лъолебила
Ахираталда нилъ рахъунелила…
ХIисаб – суал босун, лъикI–квешаб борцун,
Алжан – жужахIалде рикьулелила …

Рокьул бутIа щванищ, дий суал кьуни,
Кьелин хьул букIанин абила дица.
ТалихIай йикIанищ, дида цIехани
Балагьун йикIанин, бицина дица.

Дур гIузру щибилан тIаде руссами,
ГIадамазда божий абила дица
Дуй гIазаб кинабан кантIизаюни,
ГIумру гьелъулъ анин ахIила дица.

Гьаб дуниялда мун гурхIичIони
ГурхIиларо дуда цониги инсан
Ахираталде мун къачIадичIони,
КъачIаларо дуе аллагьас алжан.

ЧIужугIаданалъе хIехьезе кьураб
Гьаб дунялалда бихьана унти
Инсанул лъимадуй хIехьезе ккараб
ХIехьеладай гIазаб ахираталъул?

Чангиял рахарал хабалазул чу
РикIкIадгIаги гьечIищдун яхунеб къо?
Къадар щун, щапулеб чIегIераб лахIту,
ГIагардацин гурищ, рещтIунеб сордо?

Сапар бухьилелде цадахъ босизе,
ЛъикIлъиялъул бакIлъи дие гIун гьечIин,
ХIисаб гьабулелъул цIадира цIазе,
Щвезе кколеб кири дие щун гьечIин.

Дуниялги кIочон ахираталъул
Хиялаца дида жеги квелъ бачIин
Дун жеги ячIине хIадурай гьечIин
ХIалакун ахIуге, хIалимав Аллагь.

********

ДУГIА

Сабру кье, БетIергьан, сабру гьечIезе,
Гьими кье, БетIергьан, кIочон таразе.
ТалихIкье БетIергьан, талихI къаразе
Къуват кье, БетIергьан, гьеб лъугIаразе.

Божий кье, я Аллагь, божуларезе,
Рижи кье, я Аллагь, лъимал гьечIезе
ЧIалгIен рещтIинаое аваданазе,
Аваданлъи битIе пашманлъаразде.

ГIащикълъизе гьаре гIищкъу лъаларел
ГIодо руссинаре тIасан рорчIарал.
ТIагIинабе, Аллагь, гIадамазул ццим.
Цолъизаре, Аллагь, дуца милатал.

********

ДУГIА

БетIергьан, гурхIа дида къаси сордо рештIидал,
Къудратав, гурхIа дида багIараб бакъ баккидал.
ГурхIа гIалам кьижидал,гурхIа дунял борчIидал
Хасалил цIороялъулъ ихдалил рохелалъулъ
ГурхIа дир умумузда, гьезулги умумузда
ГурхIа дир лъималазда, гьезулги лъималазда.
ГурхIа гIагарлъиялда, гурхIа дир тухумалда.
ГурхIа росуцоязда, тIолго гьаб гIаламалда.
ЦIуне гъибаталдасан, цIуне жахIдаялдасан,
ЦIуне жиб тIубалареб гIащикъаб рокьудасан,
Рокьи каразда гурхIа, данделъизе квербакъе!
ХIал хъубаздаги гурхIа, ракIазе рацIцIалъи кье!

*********

«ДИР КЕЧI»

Школалъул гIужалъ гIурусалъ хъварал,
ХъахIал тIамчазда тIад къулун йиго дун
Къваридаб заманалъ загьир гьарурал,
Дирго асаразде юсун йиго дун…

Дун гьитIинго йикIун хварай яцалъул
ЦокIалал пикрабалъ пашман йиго дун
Дарсал кьолеб мехалъ гьелъул букIараб
Аваданлъиялъухъ урхъун йиго дун

ТIоцее школалда ячIиндал гIадиин
Гьелъ дида къвал базечIалгIун йиго дун
ЦIалуе тохлъидал даим щурулел
Долъул рагIабазде ракIщун йиго дун

********

ЦIУБАЧIЕЛ КУЧIДУЛ

Дида тIаса лъугьа, цIубачIел кучIдул,
ЦIидасан ургъилин дун нужода тIад
Гъваридал пикраби загьир гьаричIел
ЧIаго нуж гьаризе бугин дир ният

ГьадигIан бечедаб дирго мацIги тун
Чияр каламалде сунца тIамурай?
ТIокIаб гьечIеб гIадаб аварги кIочон
ГIурусалъ нуж хъвазе киндай кантIарай?

Кинан батаниги дица ракI – ракIалъ
Дой цIалдохъаналъул гIайиб бацIуна
ГIурус бокьаниги дой гIолилалъ
Мунагь кIудаб гьечIин парахалъула.

РекIеда рагIаби руго квалулел
Квералъ кагъталде руго гьурщулел.
Гьал дирго тетрадал хьихьизеянищ,
Яги кочIол ралъад бихьизеянищ?

Рокьи ккаралазе квербакъилунищ?
Кьал ахIун чIаразе рекIекълъилъунищ?
Щиблъун букIинедай дуда кIвелеб кечI?
Кибе боржинедай дуда кIвелеб хIинчI.

********

КучIдуца чи чIваларо
КучIдуз чIаго гьарула
Дица кечI балагьичIо –
Гьеб каранда кIутIана
Дица рокьи цIехечIо –
Гьелъул 6ухIи хутIана.
МагIуялъухъ урхъичIо –
Гьеб дий гIумруялъ кьуна.
Рохелин зигардичIо –
Лъимер гьимидал лъана.

********

– МагIихъан дуе бищун кинаб рухIел бакIлъулеб?
– Бусадаго ккечIого, унтичIого хваразул.

– КочIохъан, дуе бищун ахIизе захIмалъулеб?
– Гьимун ахIизе кколеб, ракIалъе асар гьечIеб.

– Эбел, бищунго дуе кинаб лъимер хирияб?
– Дун хвани, цадахъ холеб дида гьумер бихьичIеб

– ШагIир, дуе шигIраби кинал бищун къиматал?
– РекIелъ кIутIулел ругел,къалмие мукIурлъичIел.

– Макъназул устарасе киналъ асар гьабулеб?
– Каранда женежедулелъ, жеги рагIун ахIичIелъ.

– ГIащикъ, дуе дандчIваял кинал кIочIон толарел?
– КIалъазе рее гьечIого рокьуца хIал гьабурал.

– Нухлулав, дуе гьалмагь кинав рекIее гIолев?
– Дун вакъани вакъулев дир къварилъи бикьулев.

– ГIумру, дуеги Инсан кинавдай хIажалъулев?
– ЛъикIаб-квешаб борцунеб къоялда жив божулев.

********

Дуда квещ букIунге, пасихIав шагIир,
КIочон тараб рагIи такрарлъанилан
Нахъе гьун унарел, рекIелъ кIутIулел
КIудиял асарал аскIоса инчIин

Мунги тIурун чIоге, лъикIай кочIохъан,
Дурго кIочол гьаракь такраллъанилан
ХIалхьи бахъун араб, хIасрат цIунараб
ЦIвабзазул макъаналъ кодой йосанин.

ХIал хъублъун яхъунге, херай магIихъан,
Дур магIирагIаби такрарлъанилан.
РухIелалъул бакIлъи дий захIмалъанин
ГIищкъу кIочараб къо дида рештIанин.

Дуеги рихуге, гьитIинаб лъимер,
Дурго гIадаб гьими такрарлъанилан
Дида каранда къан, лъимер кьижанин,
Дуниялго дие гвангъун бачIанин.

Гьимиги – магIуги, рокьиги – кечIги
Кидаго цадахъищ, унго букIараб?
Цоялъ цояб хисун, гьал гIадамазе
ГIумру хиралъизе кьунищ батараб?

*********

БукIа, кечI, хинлъилъун хасел рештIиндал
БукIа, кечI, гьогьенлъун рии бухIидал.
РухIел тIаде щведал сабрулъун букIа
Сордо рукIкIун индал канлъилъун букIа.

ХIалтIудасан рокъор руссараб мехалъ
Свак чучилъун букIа мун руччабазе.
ЗахIматаб гьир тIаде бегараб гIужалъ
Бигьалъилъун мун букIа бихьиназе.

БукIа вакъарасе чадил мочIолъун
БукIа къечарасе батараб иццлъун
РикIкIаде арасе имсул тIалъилъун
ТIаде вуссарасе росдал саринлъун.

Инсуе, вацасе, вацгIалзабазе
БетIер къулизе жо щибго гьабичIого.
Росдае кIкIалалъе – дир гIадамазе
ГIад бихьизе гали дица бвхъичIо.

РахIму тун кIалъаге дир асаразда
Санал нужгун цадахъ тIамулел ругин
ТIаса – масан кьоге дир кочIой къимат
Къоял нужор берзукь дир унел ругин.

********

Кагъат камун тоге – квен бугин дир гьеб!
Къалам бахъун тоге – къеч бугин дир гьеб!
Гьарула кечI бахъун дун тогейилан;
Каранда кIутIулеб дир рухI бугин гьеб.

ЦIияб кечI гьабичIеб къоги дир гьечIин
Духъе хъвазе рагIи щайдай камулеб?
Дур кагътал цIаличIеб сордоги гьечIин,
Дуй ахIизе сарин кин батулареб?

Дие кьун батичIо кочIое гьунар
ГIумруялъго рекIелъ кечIбугониги
Дий камун батана кьурдуе махщел
Кьурдулеца асар гьабунаниги.

Макьабалъ рорженал, къад йортанхъиял!
Тамашаяб дунял буго дие кьун
Кьижидал дандчIваял,йорчIидал хьулал
Данд кколареб гIумру буго дие щун.

Гьанже гьумергийищ херлъулеб бугеб
РакIни дир некIого херлъун букIанин
БотIрода хъахIрасищ рештIунеб бугеб
РоцIцIарал къоязни цеего танин.

Беразда бихьараб гIоларогойищ,
РакIалъе бихьула гьайбатаб дунял?
РакIалъе бокьаралъ толарогойищ
РухIалъе бокьула кьун бугеб гIумру.

Къвал бан гIунтIулареб гьаб дунялалда
Къвал базе къасдазда щай дун йикIуней
Пикрабазул гIумру,цо дур бечелъи
Диего бокьахъе кьуризе лъалеб.

********

Росгун лъади данделъун,
Бижараб лъимералъул
Беричлъи! Бихьуларищ?

ГIоралгун лъарал чвахун
Лъугьараб ралъадалъул
ГIатIилъи! Бокьуларищ?

ГIадамал цоцалъ рекъон
КъачIараб хъалаялъул
Узданлъи! Рохуларищ?

Зобалгун ракьал цолъун,
ГIуцIараб дунялалъул
Гьайбалъи! Дуй гIоларищ?

Ракьгун лъим цадахъ хIалтIун
Дуй кьурал нигIматазул
Бечелъи! ГIорцIуларищ?

********

ТIоцебесеб рохелалъ зодихъе рехаралги
Замана гьоркьоб индал ракьалдехун руссуна.
ЗахIматаб къварилъиялъ къулизе гьаруралги
Гьаругьинан, мех индал, щулалъизе ритIула

ТIоцебесеб рагIи – къваридаб магIу
ГIолохъанго хварай учителалъе
Лъаялъул каваби диеги рагьун,
Ригь иналде арай дирго яцалъе.

РухIелалъ малъана рагIи абизе
РухIелалъ малъана магIу гьабизе.

ТIоцебесеб рокьи – бухIараб сарин
ХIеренго гьимарав дов гIолиласе
ГIищкъул цIа рекIараб цIалги дида бан,
Довехун вуссарав дир гьудуласе

ГIищкъуялъ малъана рагIи абизе
ГIищкъуялъ малъана сарин ахIизе.

ТIоцебесеб рохел – дир рохалил кечI
КанчIал тIугьдул гIадал цIалдохъабазе
ЦIалуде гъираялъ дида куркьбал гъун,
Дун талихI гьаюрал дир лъималазе.

ГIумруялъ малъана рагIи абизе
ГIумруялъ малъана кучIдул ургьизе.

********

Къоло микьго соналъ цее къанщарай
Дир мугIалим йиго макьилъ йихьулей.
Анкьго лъимерги тун, ахир босарай
Хирияй яцалъухъ йиго дун щолей.

Гьанже заманалда кIочон хутIараб
Щакъи лъугIун буго шакъитIелалъуб.
Дир лъимерлъиялда гIемер чIамураб
ЦIулал ручка буго дидасан билун.

Ручка-щакъи цIехон гьелъул рагьдухъе
Халатаб нухги тун йиго дун щолей
Лал тIамулеб гьоцIиб сали жубараб
Щакъихералъул гохI буго батулеб

Ва нуцIаги рагьун ма, дир яцилан
Гьелъ гIурччинаб ручка буго бегьулеб.
Гьаб пероги босе хатI лъикIлъизеян
Дихъе перо буго, гьимун, гьелъ кьолеб.

Лъаларо, сундуе дир макьуяли,
БичIчIичIо дур рагьун гьабичIеб гIакълу
Дур рекIел гьайбатлъи дие щванадай,
Мун гIадай лъугьине дида кIванадай?

********

ЦIуне руччаби!

Жиндир хIал гIечIелъур хIалтIизаризе
Тоге Илбисалъе нилъер руччаби
Щулияз тохазе тарбияги кьун
ШаргIалда тIоритIе гьел хазинаби

ГьечIо букIинесеб эбел гьечIони ….
Бихьинал, гIодогIан гьабуге къадру
Къадарал иццазулъ нуж рекъечIони,
Къиямасеб къоялъ щолебин рахIму

ЛъикIал руччабазул цIун буго дуниял
ЦIуне гьел, бихьинал, нужода аскIор
Нужор чияразда цIоб букIинчIони,
Нужоралго цIобалъ телилан хIинкъун.

********

ЯНГЬИЗАБ ГЪОТIОЛ ЖАВАБ

Дида сверухъ сверун рохь гьечIониги,
Дие гIолеб буго рикIкIад бихьулеб
Хьибилалда баккун ицц гьечIониги,
Регьел кьолеб буго гъоркьан чвахулелъ.

Чиго вахунареб борхалъиялда
Бижиялда щукру БетIергьанасе.
Инсан вачIунареб гьаб кьуруялда
Кьалбал щулалъидал рецц Аллагьасе.

ТIасан загIипабин дун ккананиги,
Цо дир кьалбазул гуч бихьизе анищ
ГIаркьалаби тIерен тIегьананиги,
Гьезда бугеб къуват борцизе анищ.

ГIазу цIадалдасан дун хIинкъуларо
ХIинкъулареб кьурулъ бижараб букIун,
Гьури-мучалъеги дун къуркьуларо
Дир гIаркьалабазулъ ганчIил би букIун.

Гьеб гъотIода релъун йихьула дунго
РикIкIада ругезул хинлъиялъ ккурай
Кьурабазда пархен батула дилъго
Кьурабазул росулъ гIурай йикIиндал.

********

– Ракьалда чIужугIадан
Мун щибизе ячIарай?

– Лъимадуй гIумру кьезе,
Гьелда ккараб борхизе.

– Дуй ракьалда бищунго
Щиб асар хиралъараб?

– Лъимер каранда кьижун
РекIелъ букIунеб асар.

– Ракьалда чIужугIадан,
Бищун берцинаб рагIи?

– Дир лъималадул кIалдисан
«Бабаян» араб рагIи.

– Ракьалда чIужугIадан
Бищун бухIараб магIу?

– Хвараб лъимералда тIад
Эбелалъ тIолеб магIу.

Нагагь гьелда рекъечIей
ЧIужугIадан ятани,

Гьей чIужугIадан гуро,
Гьелда батIияб цIар лъе.

********

РитIухълъи, мун ракьалда
БукIинего букIанищ?
Мун букIунги батила…
Дунго кватIун ятила.

Роххел дир сверабазде
Сверизего сверанищ?
Мун сверунги батила…
Дун сабру хун ятила.

ТалихI, дуца дир горду
Къиризего къиранищ?
Гьеб къирунги батила…
Дунго хIинкъун ятила.

Гьудул, мун дир гIумрудулъ
ВукIинего вукIанищ?
Мун вукIунги ватила…
Дида кIочон батила.

ГIолохъанлъи, къасдазде
Дур кверщелго букIанищ?
Гьебги букIун батила –
ГIакълуялъ тун ятила.

********

ХАРИЛ МАГЬГУН ДАГIБА

Гьаб дир мугъалдаго бижараб гIадин
РекъончIей балагье байтулманалъул.
Гьаб дир гьодилъанго баккараб гIадин
ГIодобчIей балагье гьаб къулгьуялъул,

– Дун бижиялдаса бохун букIуна,
Бахилаб дур мугъалъ бачине букIун.
Дун бециялдаса чIухIун букIуна,
ЧIухIараб дур гьодилъ рештIине букIун.

– Мун дий хIажат гьечIо, рештIа гIодобе
БитIизе те дир мугь гIодоб къулараб.
ГIазабал кьечIого борта гьоробе
Танкизе те бохдул дир сородарал.

– Дир гьайбатал махIал кIочон ратула
КIарчамаб мугъалда дур гIетI баккидал
Дир тIугьдузул кьерал кьер хун рихьула
Берцинал гьуждузда багIарлъи хъвайдал.

– Дир гьаб гIетIулгIаги махI дуй бокьидал,
Дие щай рокьукъал дур тIогьол махIал?
ТIеренал дир гъуждул дуй хиралъидал,
Дие кин сурулел дур харил кьерал?

– Хасало гIакдаца бече гьабидал;
Берцинлъун бихьила дун баччараб къо.
Гьелъул рахьги гьекъон, лъимал гьимидал,
Гьайбатаблъун ккела свакараб сордо.

ЩукIдул ритIизегIан бицардулаго
Щвана дунги магьги гьоралъул кIалтIе.
ТIасан гьеб инегIан дагI6адулаго,
ГIедегIана бохдул рукъалъул рагьде.

Мугъалда букIараб харил магь гуро
Хириял тIугьдузул нуралъул гвангъи.
Гьаб дица бичараб бакIаб гьир гуро
Гьайбатал хурдузул кIудияб квацIи.

Бокьанищ? Бице цойгияздаги.

Опубликовать в Google Plus
Опубликовать в LiveJournal
Опубликовать в Мой Мир
Опубликовать в Одноклассники

Метки: , , ,

Один комментарий на “Загьрат МухIамадова”

  1. Muhammad Saypulahilazul сказал:

    Машаллагь

Оставить комментарий

Подтвердите, что Вы не бот — выберите человечка с поднятой рукой: